Reportajen Silvino Freitas
Autoridade Nasional Petroleo (ANP) hamutuk Diresaun Nasional Kontrolu Poluisaun Autoridade Alfandega halo disposal ba produtu oli neebe la hetan autorizasaun ba espefikasaun merkadu, oli sira nee maka MPX2, Shell Advance, Shell Helix no seluk tan neebe laiha kualidade espesifikasaun motor no karreta sira, nunee oli sira nee hatama husi Yer Motor no RHJ Rahardjo tanba nee kompana rua nee hetan multa tanba komete infrasaun.
Vísi-Prezidente ANP Quintino Bere dehan, kompana Yer Motor no RHJ Rahardjo nee komete infrasaun tanba la hetan autorizasaun maibe sira hatama oli husi dalan terestre batugade nunee sira hatama oli neebe ho marka la tuir espesifikasuan, tanba nee mak sira foti desizaun hodi halo disposal ba produtu oli sira neebe kompana rua nee hatama, infrasaun sira nee komete bazeia ba inspesaun husi alfandega no ANP identifika tanba tuir lei atu hatama oli tenke hetan aprovasaun husi ANP tanba alfandega hetan problema sira nee inform aba ANP nunee ANP tun kedas ba terenu hodi halo apresaun.
“kuandu oli nee tama liuhusi portu tibar ka batugade ANP sempre halo inspesaun hodi haree nia kualidade hodi foti sampel hodi koko iha indonesia oli nee iha kualidade duni ka lae, kuandu ami halo inspesaun ami identifika iregualiridade neebe kontra nia espesifikasaun” dehan Vísi-Prezidente ANP Quintino Bere hafoin disposal oli iha tibar, (25/02).
Nia dehan tan, tanba nee kompana rua nee sei hetan multa tuir lei no multa refere laos dala ida deit maibe selu uituan uituan tuir kuantidade no folin oli nian too selu hotu multa neebe aplika ba sira, tanba oli sira neebe kompana hatama la tuir espesifikasaun mesin nian mak sei estraga konsumidor sira neebe uza ba karreta ho motor, nunee mos oli refere mos kontribui ba poluisaun neebe bele estraga ambiente inklui saude publika ema nian.
“infrasaun nee sira komete iha 2024 entaun prosesu sira neebe hateten sira komete infrasaun nee tenke mai ho evidensia, tanba nee ami ba teste laboratorio hodi hatudu ba sira teste nee mos ami halo iha nasaun neebe hatama oli mai tanba nee mak ami ba teste iha indonesia” dehan Vísi-Prezidente ANP Quintino Bere.
Nia dehan tan, oli neebe kompana hatama tenke hetan lisensa husi ANP tanba antes hatama oli kompana tenke hatama lista hodi hetan aprovasaun depois hatama sei ba check oli kaundu dehan Shell sei halo inspesaun nunee mos oli refere tenke haree mos nia kualidade tenke hanesan ho kualidade iha fabrika neebe nia hatama, nunee oli sira dadaun nee sirkula ona iha merkadu nee nia kualidade neebe diak maibe difisil atu kontrola oli sira neebe tama husi dalan terestre tanba nee ANP sei koordena ho parte relevante sira atu bele halo kontrolu iha baze liuliu lina fronterisa sira.
Diretor Diresaun Nasional Kontrolu Poluisaun Arlindo Silveiro dehan, destruisaun ba lubrikante sira neebe konsidera hanesan bandu iha timor leste tuir rekezitus autoridade nasional petroleo nian tanba lubrikante sira neebe importa mai rai laran tenke iha lisensa husi governu, tanba iha lei baze ambiental numeiru 26/2012 artigu 32 koalia konaba kontrolu poluisaun tanba nee husi parte aduaneiru no ANP halo aprendimentu ba lubrikante sira neebe la priense rekezitus, tanba nee husi aprendimentu nee sei tau hamutuk hodi halo destruisaun.
“ita ense hamutuk iha tenki deskaregamentu neebe kontrui tempu kleur ona, tanba nee ikus ita sei halo tratamentu espesial ba oli nee rasik” dehan Diretor Diresaun Nasional Kontrolu Poluisaun Arlindo Silveiro ba jornalista sira hafoin destruisaun iha Tibar, (25/02).
