Reportazen Adroaldo ‘Saretukau’
“Ita boot sira mak halo mudansa ba ita boot sira nia nasaun, ita boot sira nia nasaun hanesan nasaun ne’ebé ho demokrasi foun, maibé sei iha dezafiu hanesan ita boot sira agora”, Embaixadora Kathleen
Grupu Juventude Change Maker realiza formasaun lideransa Theory U ba joven sira iha Knua Juventude Fila Liman (KJFL).
Liu hosi abertura Embaixadora Estadu Unidus Amerika (EUA) iha Timor-Leste, Kathleen Fitzpatrick hatete haksolok tebes tanba alumni hosi embaixada Amereka ba Juventude nian, halao projetu hamutuk, hodi tulun Timor-Leste, sira mak Uma Amerika, YSEALI, USTL, Fulbright, Program Bolsa de Estudu, Programa interkambiu sira no programa seluk hosi Embaixada Estadus Unidus Amerika nian no imi mak reprezenta tebes imi nia future nasaun nian.
Nia dehan rajaun ida ita boot sira hato’o ideia, dezenvolve programa no ita boot sira mak organiza programa sira ne’e hotu, ita boot sira hatudu katak hamriik hodi lidera. Liu hosi lidera, ema rona ita boot sira no ita rona ema hotu-hotu.
“Ita boot sira mak halo mudansa ba ita boot sira nia nasaun, ita boot sira nia nasaun hanesan nasaun ne’ebé ho demokrasi foun, maibé sei iha dezafiu hanesan ita boot sira agora”, tenik Embaixadora Kathleen iha Knua Juventude Fila Liman 24/10.
Nia informa katak bazeia ba peskiza naruk durante tinan 20, ba estudu Ekolójiku Majistude iha Estadus Unidus Amerika, iha ne’ebá halo peskiza ba ema emprendedor no traballador hosi maluk sira iha Siénsia no Sosiedade hamutuk 150.
Rezultadu hosi peskiza ne’e hamosu teória ida, atu prepara kapasidade lideransa, aprendijazen no jestaun ne’ebé ita uza da-daun iha momentu ne’e hanaran Theory U.
“Ami nia antigu alunus sira hatete, teória ida ne’e di’ak liu fali. ha’u fiar ita boot sira sei hetan oportunidade hodi aprende konabá ida ne’e komesa agora. Saída mak ha’u gosta tebes hosi prosesu Theory U, mak ita komesa rona ema seluk no observa ho di’ak mundu iha ita nia sori-sorin nu’udar kapasidade lideransa ida ne’ebé importante tebes”, hateten Embaixador.
Iha fatin hanesan Diretor Jeral Juventude no Desportu, David Tomas de Deus agradese ba Embaixada Estadus Unidus Amérika tanba bele ajuda ona fundus ba grupu ida ne’e. Iha Timor ita iha grupu ida naran bandidu kualidade, agora ita boot sira estudante ho kualidade.
“Imi ba aprende fila mai imi la tuur nonok, imi la toba dukur, wainhira imi iha inisiativa hakarak aprende no fahe ba sosiedade, liu-liu ba estudante sira para oinsá atu sai líder ida ne’e di’ak”, hateten David.
David dehan konnesementu ne’ebe ita buka no kontinua fahe ba kolega sira seluk no hatutan mos ba familia iha uma laran, kolega sira iha eskola no professor sira.
Nia hateten SEJD iha posibilidade suporta programa ne’e ba oin, atu bele kontinua nafatin aktividade ne’e, hodi habelar ba maluk sira iha munisípiu sira, liu-liu iha área rural ne’ebé la hetan liu oportunidade sira hanesan ne’e.
Iha parte sorin Koordenador Grupu Change Maker, Igor da Costa Carvalho hateten grupu Change Maker hanesan grupu joven ne’ebé kria wainhira hetan fundu hosi Embaixada Amérika, hodi fo formasaun ba juventude iha empoderamentu lideransa nian.
Proposta hosi formasaun lideransa ne’e atu empodera joventude sira, atu treinu sira hodi hetan bolsu estudu no servisu. Iha parte seluk atu promove igualdade no diversidade hodi promove inkluzaun sosial.
“Ita lori ema oi-oin hosi universidade ho ensinu sekundária, sira bele koñese malu, aprende hamutuk hodi hasae’ sira nia abilidade lideransa. Tanba joven barak sei menus abilidade lideransa, tanba ne’e kria formasaun ida ne’e hodi kria oportunidade atu prende”, hateten Diretor Jeral Juventude no Desportu.
Theory U hanensan teoria ida ne’ebé ajuda líder ida atu iha open mind, open heart no open wind hodi hatene uluk nia aan molok lidera ema ema seluk. Formasaun lideransa ne’e tarjetu ba eskola sekundariu ualu (8) hanesan eskola sekundariu 12 de Novembru, 4 Setembru, 10 de Dezembru, Colégio Paulo VI, SACROJES, Externato de São José, St. Madalena de Canossa no São Pedro no ba universidade lima (5) hanesan Institute of Business (IOB), Dili Institute of Technology (DIT), UNITAL, UNDIL no UNPAZ. Total partisipante sira hamutuk 45 no formasaun ne’e rasik hahú outubru 24 to’o dezenbru dia 5.
