Reportajen Silvino Freitas
Liuhusi plenaria iha parlamentu nasional deputadu Helder Freitas ‘Kamarudin’ levanta fiskalizasaun husi komisaun F neebe trata asuntu saude fiskaliza ba servisu saude iha munisipiu Vikeke neebe identifika iha suku Osorua laiha postu saúde no postu saude Uaibobo no Liaruka neebe kondisaun la diak tenke halo reabilitasaun inklui sentru saude Vikeke villa, nunee mos postu saude balun menus rekursu umanu atu halo atendimentu no postu saude balun mos falta hela aimoruk.
Deputadu Helder Freitas ‘Kamarudin’ dehan, liuhusi fiskalizasaun neebe sira husi komisaun F hamutuk visi-prezidente komisaun iha munisipiu Vikeke maka iha sentru saude Ossu iha maternidade nian ho fatin neebe kloot labele fo espasu neebe diak ba ema liu nain rua, nunee karik inan sira partus mak liu ona ema nain rua tenke transfere ba sentru saude Vikeke nunee mos iha postu Ossu raik iha suku sanulu maibe iha suku osorua maka laiha postu saude.
“iha postu saude rua maka presiza fila fali reabilitasaun maka postu saude Uaibobo no Liaruka ne’e kleur ona plafon no kalen sira mos dodok hotu ona presiza tenke halo reabilitasaun” dehan Deputadu Helder Freitas ‘Kamarudin’ liuhusi ninia intervensaun iha plenaria parlamentu-nasional, (30/03).
Nia dehan tan, nunee mos sira halo fiskalizasaun iha iha postu saude Loihunu iha fasilidade neebe diak tanba halo ona reabilitasaun maibe iha postu saude Loihunu presiza rekursu umanu atu halo atendimentu ba pasiente sira no iha postu saude Buanurak iha preokupasaun tan la dun asesu diak ba bee tanba bee neebe dadaun nee sira uza kiik presiza sanio atu bomba bee ba postu refere, tanba bee laiha nunee enfermeiru ho doutor sira tenke kuru rasik bee hafoin uza.
“iha segundu dia ami kontinua ba vizita sentru saude Beloi mos aimoruk item la kompletu maibe sira esplika mai ami katak sufisiente no problema maka aimoruk kleur ona komesa husi 2018 too 2026 too ohin loron tau hamutuk deit iha neeba la expire tau hamutuk deit iha neeba, favor visi-ministra saude haree took ida nee” dehan Deputadu Helder Freitas ‘Kamarudin’.
