Reportajen David da Costa
Dokumentu prinsipál tolu, kodigu mineriu ba petróleu, kontratu fahe produsaun no rejime fiskál ne’e sai fator determinante ba finalizasaun projetu Greater Sunrise, ne’ebé agora dadaun sei iha hela fase negosiasaun entre Governu Timor-Leste no Governu Austrália.
Ministru Petróleu no Rekursus Minerais, (MPRM), Francisco da Costa Monteiro, hateten, kona-ba Greater Sunrise ne’e Timor-Leste ho Austrália iha hela fase negosiasaun, tanba iha dokumentus ne’ebe importante hodi halo diskuzasaun para finaliza lalais maka kodigu Menerai ba Petroliu, kontratu fahe produsaun no rejime fiskal.
“Imi hotu hatene katak ita iha fase negosiasaun nia laran hela iha dokumentus tolu prinsipais ne’ebe maka presiza finaliza maka, dokumentus Petroleum mining code, Production Sharing contract, Fiscal regime,” dehan Ministeru Petróleu no Rekursus Minerais, (MPRM), Francisco da Costa Monteiro, ba Jornalsita sira iha Palásiu Governu, Kinta 16/04.
Nia haktuir, reprezentante espesial husi governu Austrália mos mai nota katak husi parte Austrália nian mos kontente haree katak governu rua konsege hamutuk liu husi ninia ekipa negosiador sira konsegue finaliza ona dokumentu prinsipal ida naran kodigu Menerai ba Petroliu (PMC).
“Maibé iha fulan Juñu sei iha ronde negosiasaun rua, ida iha Australia Canberra no ida iha Timor-Leste, hein atu finaliza tan dokumentu rua seluk ne’ebe importante maka kontratu fahe produsaun no rejime fiscal,” nia hatete.
Maibé antes atu to’o iha ne’eba mos ekipa rua ne’e iha negosiasaun online ne’ebe intensivu loos hanesan agora mos ANP ho nia ekipa ko’alia hela mos ho australia sira ne’ebes servisu sira ne’e intensivu makaas loos.
“Reprezentante governu Austrália ne’e mos agradese governu ninia apoiu, maibé mos atu hatete katak Austrália iha komitmentu hanesan sira nia Primeiru Ministeru hateten ona katak atu dudu prosesu ne’e lalais liu tan,” nia dehan.
Governu Australia mos nota liu husi nia ekipa sira haree katak prosesu ne’e la’o diak teb-tebes, iha buat balun ne’ebe maka presiza diskusaun liu tan, maibé fiar katak iha tempu hirak tuir mai sei buka solusaun hamutuk.
Alende ne’e mos ohin mai akompaña Primeiru Ministru Kay Rala Xanana Gusmão hodi enkontru ho reprezentante espesial governu Austrália ninia ba iha Greater Sunrise nian, ohin reprezentante governu Austrália mos relata kona-ba Greater Sunrise, oinsa maka nasaun rua ne’e atu servisu hamutuk hodi dezenvolve ida ne’e.
“Ohin nia mai komprimenta ba Primeiru Ministru no fó nia hanoin kona-ba progresu Greater Sunrise, no ninia hanoin balun oinsa governu rua ne’e servisu hamutuk atu dezenvolve kampu Greater Sunrise ne’ebe ita hotu-hotu tau atensaun hela ba,” nia dehan.
