Reportajen Estajiáriu Qintiliana Guterres
Asosiasaun emprezária Feto Timor-Leste (AEMTL) ohin hahú lansa ona Prémiu Emprendedora ba feto emprezária Timor-Leste iha sanulu no iha kategoria lima maka hanesan Inisitiva ba Empoderamentu Ekonómiku, Negósiu Lidera husi Feto (Dili), Negósiu Lidera Husi Feto (Munisipiu), Lider Feto no mos Feto iha Servisu Finanseiru.
Prezidente AEMTL, Hergui Luina Fernandes Alves, hateten, bainhira feto Timoroan sira hari sira nia negósiu reziliénsia ne’ebé la nakadoko sira forma futuru nasaun nian, guia husi korajen vizaun no reziliénsia ne’ebé la nakadoko.
“Prémiu Emprendedora feto Timor-Leste nian maka plataforma signifikativu atu onra exelénsia, inspira mudansa no selebra prestasaun espesiál feto sira nian iha negósiu hodi promove unidade, reforsa kadeia valor no lidera kriasaun servisu iha nasaun,” dehan Prezidente AEMTL Hergui Luina iha nia diskursu iha lansamentu Prémiu Empreendedora ba feto Emprezária sira iha Palásiu Prezidensiál Bairu-Pite, Segunda 4/05.
Nia haktuir Emprendedora feto sira halo papél importante liu-liu iha dezenvolvimentu ekonómiku Timor-Leste nian, liuhusi kresimentu empreza mikro ki’ik no Mediu sira ne’ebe kria servisu no apoia komunidade sira. Prémiu Emprendedora feto destaka kontribuisaun sira ne’e hodi promove visibilidade no oportunidade boot liu ba empreza sira ne’ebe lidera husi feto.
Nune’e mos Jerente Rejionál IFC nian ba FIG Advisory/Upstream, East Asia and The Pacific, Christian Ongoma, dehan, Emprendedora feto sira iha Timor-Leste hari negósiu ho determinasaun ne’ebe notável, maibé barak sei hasoru bareira ba Finansiamentu ne’ebe dala barak aumenta, tanba asesu limitadu ba informasaun negósiu no finanseira ne’ebe limitadu no ligasaun ba instituisaun finanseira sira.
Tanba ida ne’e, hodi selebra sira nia susesu no hametin asesu ba koñesimentu no rede sira, Prémiu Emprendedora feto bele ajuda empreza sira ne’ebe feto sira maka na’in atu buras, kria empregu sira, no kontribui ba ekonomia ida ne’ebe inkluzivu liu.
Selebra impaktu ne’ebe aumenta husi emprendedora feto sira ba ekonomia Timor-Leste nian, Prémiu Emprendedora Feto destaka oinsá empreza sira ne’ebé lidera husi feto forma kresimentu inklusivu no dezenvolvimentu nasionál.
Reprezenta Grupu Banku Mundial ba Timor-Leste, David Freedman, hateten, iha tinan 2024 Prémiu Emprendedora feto rekoñese talentu no realizasaun husi empreendedora feto sira iha Timor-Leste.
Tanba ne’e, Grupu Banku Mundial urgullu atu apoia programa ida ne’e. Tuir peskiza nasionál MSME nian foin lalais ne’e, feto sira lidera liu metade husi empreza tomak mikro, ki’ik, no médiu iha Timor-Leste, ne’e halo negósiu sira ne’ebé lidera husi feto sai forsa ne’ebé vital no buras iha dezenvolvimentu nasaun nian.
Prémiu Emprendedora feto Timor-Leste 2026, aprezenta prémiu sanulu ho kategoria lima, ne’ebe selebra eselénsia iha emprendedorizmu no lideransa ne’ebe feto sira lidera. Prémiu ne’e sei rekoñese empreza hirak ne’ebe hahú ho estraordináriu ne’ebe feto sira lidera, empreza sira ne’ebe estabelese ona, lider korporativu sira, no inisiativa sira ne’ebe promove inkluzaun finanseira feto sira nian no apoia kresimentu empreza sira ne’ebe feto sira lidera.
Kategoria Prémiu ba Emprendedora feto Timor-Leste iha premiu sanulu (10) ho kategoria lima maka hanesan: Inisitiva ba Empoderamentu Ekonómiku, Negósiu Lidera husi Feto (Dili), Negósiu Lidera Husi Feto (Munisipiu), Lider Feto no mos Feto iha Servisu Finanseiru.
Kategoria primeiu maka Inisitiva Ba Empoderamentu Ekonómiku, sei fahe ha rua, ida maka inisiativa di’ak liu ne’ebé Promove Inkluzaun Finanseira ba Feto Sira (Organizasaun/Empreza): Rekoñese inisiativa/programa ne’ebé ativamente promove inkluzaun finanseira b a feto sira.
No rua maka inisiativa di’ak liu ne’ebé Promove Kresimentu Negósiu Lidera husi Feto Sira (Organizasaun/Empreza): Rekoñese inisiativa ida ne’ebé apoia ativamente kreximentu no susesu negósiu sira ne’ebé lidera husi feto, partikularmente iha setór Empreza Mikro, Kiik, no Mediu (MSMEs iha Inglés).
Atividade he’ebé bele inklui esforsu sira iha kapasitasaun, ligasaun ba merkadu no negósiu nian, mentorizasaun, asisténsia finanseira, ka modelu apoiu estratéjiku seluk ne’ebé kontribui ba sustentabilidade no espansaun empreza ne’ebe feto sira mak lidera ou na’in.
Iha kategoria Segundu maka Negósiu Lidera Husi Feto (Dili), ida ne’e mosfahe ba rua, ida maka na’in ba negósiu ne’ebe di’ak liu Tinan ne’e nian lidera husi Feto sira – Negósiu estabelesidu Individu): Rekoñese feto ne’ebé lidera no na’in ba negosiu, ho susesu lidera negosiu durante periodu liu ona tinan 3 no hatudu exelênsia no lideransa ne’ebé di’ak
No rua maka na’in ba negósiu foin-sa’e ne’ebe di’ak liu Tinan ne’e nian lidera husi feto sira (Individu): Rekoñese feto ne’ebe lidera no na’in ba negosiu, ho susesu lidera negosiu foin sae no hatudu inovasaun no kreximentu ne’ebé notáve iha tinan 3 dahuluk operasaun nian.
Iha kategoria terseiru maka Negósiu Lidera Husi Feto (Munisipiu), ida ne’e mos fahe parte rua, ida maka na’in ba negósiu ne’ebe di’ak liu tinan ne’e nian lidera husi Feto sira. Negósiu estabelesidu (Individu): Rekoñiese feto ne’ebé lidera no na’in ba negosiu, ho susesu lidera negosiu durante periodu liu ona tinan 3 no hatudu exelênsia no lideransa ne’ebe di’ak
Iha rua maka na’in ba negósiu foin-sa’e ne’ebe di’ak liu tinan ne’e nian lidera husi feto sira (Individu): Rekonese feto ne’ebé lidera no nain ba negosiu, ho susesu lidera negosiu foin-sa’e no hatudu inovasaun no kreximentu ne’ebé notável iha tinan 3 da-uluk operasaun nian.
Iha kategoria kuartu maka Lider Feto, ida ne’e mos fahe ba rua; ida maka lider feto korporativu tinan ne’e nian (Individu): Fó onra ba ezekutivu feto ne’ebé hatudu abilidade lideransa no jestaun esepsionál iha nia kna’ar.
Iha rua maka modelu tinan ne’e nian (Individu): Selebra feto ne’ebé sai hanesan modelu kareira tinan nian ne’ebé inspira feto sira liu husi nia montorizasaun, atingimentu, no kontribuisaun ba iha komunidade
Iha Kategoria lima ikus maka Feto Iha Servisu Finanseiru, ida ne’e mos fahe ba rua, ida maka lider feto e sepsional iha setór servisu finanseiru (Individu): Rekofese feto ne’ebé hatudu ona lideransa di’ak iha setór servisu finanseiru, no lori impaktu no mudansa signifikativu
No rua maka inovasaun finanseira di’ak liu ne’ebé foka ba Jéneru (Organizasaun/Kompañia): Rekonese solusaun ka produtu inovativu sira iha setór servisu finanseiru ne’ebé foka espesifikamente ba inkluzividade jéneru.
Ho inskrisaur nakloke ba área munisipál hotu-hotu, programa ne’e enkoraja nomeasaun oin-oin no inkluzivu. Iha nomeasaun loke to’o 8 Jullu 2026. Individu, instituisaun, ONGs, no empreza sira ne’ebé baze iha Timor-Leste iha direitu atu kandidata a’an. Kandidatura sira tenke inklui esplikasaun klaru ida kona-ba kandidatu ninia susesu no impaktu sira.
Entertantu iha fatin hanesan Prezidente Repúblika (PR) José Ramos-Horta, hateten, International Finance Corporation, Austrália no New Zealand ho parseiru sira seluk kontinua fó apoiu ba feto iha negósiu iha Timor-Leste, nune’e kontribui ba fortalesimentu ekonómiku no empoderamentu feto sira.
Xefe Estadu mos rekoñese papél importante feto sira nu’udar inan, bin, tia no emprezária sira ne’ebé iha kontribuisaun boot ba dezenvolvimentu nasaun, no hato’o mos agradese ba parseiru sira ne’ebé fó apoiu atu hasa’e kapasidade no oportunidade ba feto emprezária sira iha país ne’e.
“Papél imi nian señora, ama sira ha’u rekoñese, ita hotu-hotu tenke rekoñese no agradese ba imi nu’udar inan, bin, tia, nu’udar emprezária. Imi nia kontribuisaun importante tebe-tebes, ha’u agradese ba parseiru sira, IFC Austrália, Nova Zelándia, no sese ne’ebé bele apoiu feto iha negósiu Timor-Leste,” nia dehan.
