Reportajen Silvino Freitas
Uniaun Estudante Laclubar Oan (UELO) lamenta ho desizaun Diressaun Nasional Transporte Terestre (DNTT) Munisipiu Manatuto hodi hapara transporte publiku buss no grandmax halo movimentu diresaun Laclubar Dili, tanba desizaun refere difikulta movimentu komunidade ho estudante sira halo viajen husi Dili ba Laclubar no Laclubar mai Dili.
Portavoz Uniaun Estudante Jerónimo Soares dehan, desizaun husi DNTT ho DMTC munisipiu Manatuto neebe limita operasaun transporte husi Laclubar mai maibe diresaun Natarbora Soibada no Laclo hetan fali autorizasaun ba movimentu, nunee sira sente hamosu injustisa iha sira nia munisipiu tanba iha fulan tolu ba kotuk politika sira obriga operador transporte laclubar nian atu para operasaun neebe hamosu konsekuensia direta ba komunidade no estudante, nunee husi deizaun refere viola povu laclubar nia direitu atu bele asesu ba transporte hodi lori produtu ba merkadu.
“juventude sai vitima direta no estudante sira neebe luta atu hetan edukasaun agora hasoru obstakulu tanba desizaun neebe la sensivel ba realidade sira, ami sei hato’o mos kazu nee ba parlamentu nasionál no diretamente ba primeiru ministru atu husu intervensaun” dehan Portavoz Uniaun Estudante Jerónimo Soares lihusi konferensia imprensa iha jardin 5 de maio, (08/05).
Nunee mos estudante Simão Gonzaga reforsa, antes nee sira halo ona konfirmasaun ho operador Bus no Grandmax katak lisensiamentu ba operasaun diresaun Laclubar Dili hahu iha 2015 parte DNTT autoriza la ho lisensiamentu katak lisensiamentu nee diresaun Manatuto Dili mos bele kobre diresaun too postu laclubar nian, maibe hafoin hapara movimentu diresaun refere parte DNTT Manatuto seidauk halo klarifikasaun ruma ba ejijensia neebe sira hatoo.
“dezde 2015 sira rejistu ba DNTT nee sira hakarak diresaun Laclubar Dili ba mai, maibe iha neeba DNTT sira rasik hateten katak loloos nee tau deit Manatuto Dili mos bele kobre too postu laclubar nee rasik maibe nufim iha mudansa fali sira la esplika klaru konaba asuntu ne’e, too agora povu laclubar liuliu vendedor sira nee sai vitima” reforsa estudante Simão Gonzaga.
Estudante Luzinho Pereira haforsa tan, husi parte nain ba karreta no operador sira halo ona dialogu ho parte relevante sira iha semana kotuk maibe esplikasaun husi dialogu la konsege konvense komunidade sira husi postu laclubar nian tanba desizaun refere prejudika laos ba transporte publiku diresaun Dili Lacalubar maibe afeta mos ba komunidade no estudante sira nia movimentasaun entre Dili Laclubar no Laclubar Dili.
