Reportajen Silvino Freitas
Grupu Aifunan Fresku Erlesu (AFE) kontente tebes partisipa iha espozisaun ne’ebé organiza husi Oxfam no APFTL iha Rabilau-Maubisse tanba bele promove sira nia produtu, nune’e sira husu ba governu atu sosa aifunan fresku no minimiza aifunan masa ne’ebé importa husi rai-liur faan iha loja.
Koordenadoor grupu AFE Daniel Soares Mendonça dehan, durante sira nia grupu ejiste NGO Maharu mak apoia tebes sira nia grupu no fo motivasaun ba sira atu bele halo produsaun ba sira nia produtu, nune’e total ema husi grupu AFE iha ema nain 20, nune’e husi aifunan ne’ebé ho folin $10 too $15 maka bele ajuda sira atu sosa hahan no sustenta familia uma laran inklui mos bele uza osan sira ne’e bele sosa vazu sira hodi kuda fali ai-funan.
“hau kontente ho atividade interkambiu ne’e tanba inportante tebes tanba husi atividade ne’e mak ema hatene ami nia grupu ne’e husi ne’ebé” dehan koordenadoor grupu AFE Daniel Soares Mendonça bainhira partisipa iha ekspozisaun ne’ebé organiza husi Oxfam no APFTL iha Rabilau-Maubisse, (12/08).
Nia dehan tan, durante sira nia produsaun sira tenke buka rai-metan ne’ebé sai dezafiu ba sira tanba husi rai-metan ne’e mak bele halo ai-funan fresku, nune’e prosesu produsaun sira maka tenke kaor rai-metan ho kafe kulit deut hamutuk bibit iha polinbak hafoin kuda fali iha vazu kiik sira.
“hau nia esperansa ba future maka motiva nafatin ba kolega no amigo sira hotu ne’ebé partisipa iha fatin ne’e mai ita hotu hamutuk produz ita nia aifunan fresku rasik” dehan Daniel.
Koordenador ne’e konkui ho rekomendasaun ida katak, governu atu buka maneira oinsa atu bele sosa aifunan fresku no labele importa nafatin ai-funan masa sira faan iha loja ne’ebé transporta husi rai liur, no nia mos rekomenda ba komunidade tomak atu labele sosa nafatin aifunan masa ne’ebé importa husi rai-liur maibe sosa mak aifunan fresku ne’ebé produz iha rai laran.
