Reportajen Estajiáriu Cristiano dos R. Gama
Embaixadór husi Emiradu Árabe Unidu (EAU) mai Indonézia, hato’o parabéns ba povu Timor-Leste tanba selebra Loron Restaurasaun Independénsia ba dala 24, no reafirma komitmentu atu hametin kooperasaun bilaterál entre nasaun rua iha área edukasaun, infraestrutura, turizmu no dezenvolvimentu kapitál umanu.
Embaixadór husi Emiradu Árabe Unidu (EAU) Mai Indonézia, Abdullah Salem, hato’o parabéns ba povu Timor-Leste ne’ebé aban selebra nia loron Restaurasaun Independénsia ba dala 24, iha loron 20 de Maiu. Iha oportunidade ne’e, nia mós hato’o kumprimentos hosi Prezidente EAU, Alteza Sheikh Mohamed bin Zayed Al Nahyan, ba Xefe Estadu Timor-Leste.
No iha sorumutu ne’e, ko’alia kona-ba relasaun bilaterál jerál entre rai rua nian no foka liu ba ezekusaun parseria oioin, inklui mós serimónia lansamentu fatuk-azinan ba projetu rezidénsia estudante feto nian ne’ebé sei hala’o mós iha loron 20 de Maiu, hamutuk ho selebrasaun boot nasaun nian.
Projetu dezenvolvimentu kapitál umanu mós sai hanesan prioridade, liuhusi planu kooperasaun iha área edukasaun diplomátika ne’ebé hein katak sei hahú mós iha tinan ne’e nia laran.
“Ami mós diskute ona kona-ba kooperasaun ho EAU ba programa treinamentu diplomata sira-nian iha Akademia Diplomátika Anwar Gargash, ne’ebé ami hein katak sei hala’o iha trimestre da-toluk ka da-haat iha tinan ne’e. Memorandu Entendimentu (MoU) ida sei asina, no liu tiha ida ne’e, ami sei bele ezekuta programa treinamentu sira ne’e,”dehan Embaixadór husi Emiradu Árabe Unidu (EAU) Mai Indonézia, Abdullah Salem ba jornalista sira iha Palásiu Prezidensiál Bairu-Pite, Tersa 19/05.
Nia esplika, atu nune’e projetu sira ne’e bele la’o ho susesu, ekipa tékniku husi UAE Aid (Asisténsia EAU) sei tún mós ba kampaun hodi halo avaliasaun no inspesiona projetu potensiál sira seluk iha sidade Díli laran.
Tanba ne’e, governu ho nasaun rua ne’e mós nakloke ona hodi diskute posibilidade kolaborasaun foun iha futuru, liuliu iha área infraestrutura no mós turizmu.
“Ami iha relasaun ne’ebé di’ak tebes entre parte rua, no ha’u fiar katak relasaun ne’e sei fó nafatin rezultadu ne’ebé di’ak tebes,” nia dehan.
