Reportajen Estajiáriu Cristiano dos R. Gama
Iha aniversáriu Provedór Direitos Humanos no Justisa (PDHJ) ba dala-22, PDHJ kestiona tebes atitude husi instituisaun Estadu no entidade respondente sira ne’ebé dala ruma la fó importánsia no laiha vontade polítika hodi implementa rekomendasaun kazu nian, maske instituisaun ne’e konsege hatudu progresu boot hodi reduz kazu torturasaun iha prizaun ba zero porsentu durante tinan 2025.
Provedór-Adjuntu Boa Governasaun, Rigoberto Monteiro, hatete, PDHJ rekoñese katak dezafiu boot liu ne’ebé PDHJ hasoru ohin loron la’ós de’it limitasaun orsamentu ka kestaun internal, maibé mai husi parte li’ur ne’ebé la dudu responsabilidade ba oin.
“Ita rekoñese katak rekomendasaun barak sai husi PDHJ, dala barak mos entidade respondente sira la preokupa no la fó importánsia ba rekomendasaun sira ne’ebé PDHJ hasai. Ida ne’e mós obstákulu boot ba servisu PDHJ nian atu fó satisfasaun ba ita nia sosiedade,” dehan proveidór-adjuntu boa governasaun bainhira halo diskursu iha salaun apuramentu CNE Kolmera, Tersa 26/05.
Nia esplika, maske hasoru bloku polítika husi entidade respondente sira, PDHJ konsege lori mudansa boot liuhusi pilar servisu prevensaun nian. Bazeia ba relatóriu monitorizasaun regulár iha sela detensaun no prizaun sira, PDHJ konsege (reduz) kazu torturasaun husi tinan 2024 ba porsentu zero iha tinan 2025. Rezultadu ne’e sai hanesan lisaun di’ak no referénsia kampaña anti-tortura ba organizasaun mundiál sira.
Nia mós relata katak hahú husi tinan 2023 to’o Abríl tinan 2026 ne’e, PDHJ konsege hatama ona leis hamutuk 17 ba Tribunál hodi husu fiskalizasaun ba kestaun konstitusionalidade, nu’udar knaar hodi halo balansu ba podér estadu nian. Iha parte protesaun, kazu hamutuk 179 mak rejista iha tinan 2025, no kazu 101 konsege konklui ona nia investigasaun.
Nune’e mos atu responde ba dezafiu dijitál no kazu mál-administrasaun ofisiál sira nian ne’ebé sei sa’e, PDHJ promete sei halo revizaun lalais ba manuál formasaun nian, hametin kooperasaun ho Akademia Polísia, Institutu Defeza, no INAP, inklui moderniza no digitaliza sistema jestaun kazu nian iha nasionál no munisípiu sira.
PDHJ fó hanoin hikas katak responsabilidade atu proteze direitus umanus no dudu governasaun di’ak la’ós kbiit instituisaun nian mesak, maibé presiza serbisu hamutuk nu’udar responsabilidade kolektiva husi Estadu, sosiedade sivíl, média, no povu tomak.
