Reportajen Silvino Freitas
Instalasaun antenna Starlink iha sede suku 450 iha teritoria nasional nee bazeia ba planu asaun annual 2026, nunee prosesu instalsaun nee ho ajudikasaun direta tanba Starlink mak velosidade diak liu operador no ISP (internet service provider) sira, nune’e suku sira iha villa laran sei halo desliga hotu kuandu fiu fibra optika dada besik ona hodi uza ba sede suku no antenna sei responsabiliza husi kompana stalink tanba governu selu internet laos sosa kits starlink.
Ministru Transporte Komunikasaun Miguel Marques Manetelo dehan, instalasaun starlink iha sede suku hotu iha teritoriu nasional nee tama iha planu asaun annual neebe halo kooperasaun entre Ministeriu Administrasaun Estatal, nunee iha planu asaun annual tinan 2026 neebe define nanis ona liga ho instalasaun starlink iha 450, nunee husi operador telekomunikasaun 3 no ISP liu 20 nee iha rua deit maka uza satellite maka starlink no kacifik maibe iha planu asaun annual governu hili liu maka starlink tanba velosidade internet neebe diak liu.
“konaba ajudikasaun nee tanba razaun tekniku, se ita hatene katak iha deit kompana ida mak bele fornese servisu internet nee diak liu ita ba halo konkursu publiku halo saida tanba ikus mai nia maka tenke manan tanba nee mak ajudikasaun ho razaun tekniku no urjensia” dehan Ministru Transporte Komunikasaun Miguel Marques Manetelo iha salaun GMN Bebora, (01/06).
Nia dehan tan, suku sira iha villa laran neebe instala hotu starlink nee ba provizoriu deit maibe kuandu fiu fibra optika nee dada besik mak sei halo desligasaun ba suku sira neebe instala starlink no uza fali fibra optika, nunee kits starlink neebe dadaun nee instala governu la sosa karik atu sira foti fali ka monta nafatin nee kompetensia sira nian tanba sasan sira neebe intala governu la sosa maibe selu deit mak internet ho folin $150 kada fulan.
“tabela neebe faan ba privadu nee ketak no ba seitor privadu nee ketak, faan ba $150 nee imi ba konfirma ho starlink tanba ho osan nee ita la sosa kits neebe monta iha sede suku tanba nee mak kuandu loron ida fiu nee ba too tiha iha neeba maka desliga ita la lakon buat ida tanba kits nee starlink mak monta ninian gratis” dehan Ministru Transporte Komunikasaun Miguel Manetelo.
Antes nee iha loron 4 fulan maiu tinan 2026 governu liu husi Ministru Transporte Komunikasaun Miguel Marques Manetelo selebra ona kontratu ho kompana Vorakai Lda hodi expanda konektividade internet ba suku 450 iha teritoriu nasional.
