Reportajen David da Costa
Eis Prezidente Repúblika Demokrátika Timor-Leste (RDTL), no Prezidente FRETILIN Dr. Francisco Guterres Lú Olo, hakotu iis iha Ospitál Prince Court, Kuala Lumpur, Malázia, hafoin hetan tratamentu saúde intensivu. Ninia partida konsidera nu’udar lakon boot ba família, FRETILIN no povu Timoroan tomak.
Eis Prezidente Repúblika Demokrátika Timor-Leste (RDTL), no atuál Prezidente Paridu FRETILIN Francisco Guterres Lú Olo, hakotu iis ona ohin iha Ospitál Prince Court, Kuala Lumpur, Malázia, hafoin hala’o tratamentu saúde intensivu.
“Ho laran-triste kle’an no moras boot, família fó hatene katak Sua Exelénsia Prezidente FRETILIN nian, eis Prezidente RDTL nian, Presidente Asembleia Konstituente no eis-Prezidente Parlamentu Nasionál nian, Dr. Francisco Guterres Lú Olo, hakotu iis ona ohin, iha Ospitál Prince Court, iha Kuala Lumpur, Malázia, hafoin hala’o tratamentu saúde intensive,” hatete iha Pagina Ofisial Facebook Francisco Guterres Lú Olo ohin ne’ebe Neon metin asesu, Domingu 21/06.
Tuir informasaun hosi família, ninia partida reprezenta lakon boot ida ne’ebé labele troka ba família, kaben, oan sira no parente tomak. Lakon ne’e mós senti hosi membru FRETILIN, kompañeiru luta sira no povu timor-oan ne’ebé durante tinan barak servisu hamutuk ho nia atu harii Timor-Leste ida ne’ebé livre, demokrátiku no soberanu.
Dr. Francisco Guterres Lú Olo nu’udar figura istórika ida iha luta ba independénsia no dezenvolvimentu nasaun. Nia serve ona hanesan Prezidente Asembleia Konstituinte, Prezidente Parlamentu Nasionál no Prezidente Repúblika, no kontinua lidera FRETILIN to’o iha tempu ikus nia moris.
Família husu ba povu no parte interesada hotu atu respeita privasidade família nian iha momentu lutu no triste ida ne’e, enkuantu kontinua halo orasaun no fó omenajen ba memória, legadu no dedikasaun Dr. Francisco Guterres Lú Olo ba povu Timoroan.
“Ami husu ba hotu-hotu atu respeita família nia privasidade iha momentu susar ne’e, nu’udar ita hamutuk iha orasaun no fó omenajen ba ninia memória, ninia legadu, no ninia dedikasaun ba povu Timoroan,” hateten iha pagina ofisial Lú Olo,
Iha tempu lutu ida ne’e, família mós hato’o agradesimentu ba ema hotu ne’ebé hatudu solidariedade, amizade no apoiu ba família durante períodu difísil ne’e.
Maibé Informasaun kona-ba serimónia fúnebre ba matebian Eis Prezidente Repúblika Demokrátika Timor-Leste (RDTL), no atuál Prezidente Paridu FRETILIN Francisco Guterres Lú Olo, sei fó sai iha tempu oportunu.
