Reportajen Silvino Freitas
Membru Polisia Nasionál Timor-Leste (PNTL) ho inisial EPLM diviza ajente husi Unidade Espesial Polísia (UEP) deskonfia tiru an iha nia rezidensia Matadoru Dili, nune’e parte investigasaun kriminal polisia nian asegura hotu ona evidénsia nune’e aprezenta ba Ministeriu Publiku.
Portavoz PNTL Suprentidente Xefi João Belo dehan, insidente grave ida ne’ebé akontese iha horikalan membro Policia Feto ida deskonfia tiru an too lakon vida akontese por volta oras 09:30 horikalan, nune’e centro operasaun Policia nasional Timor Leste simu ona informasaun katak akontese insidente deskonfia tiru an ida ne’ebé Polísia Nasionál feto ida ho inisial EPLM, iha zona Matadoru, iha Dili.
“agente ne’e halo tiru ba nia aan rasik, rezulta iha ferimentu ho gravidade boot, familia vitima nian, lalais, husu ambulánsia atu halo salvamentu, no vitima ne’e transporta ho urjénsia ba Ospitál Nasionál Guido Valadares” dehan portavoz PNTL Suprentidente Xefi João Belo liuhusi konferensia imprensa iha Komando Jerál, (25/06).
Nia dehan tan, hafoin akontesimentu ho esforsu husi ekipa médika sira husi HNGV, labele salva ajente ne’e nia vida tanba lakon raan fakar ne’e situasaun ne’e husi hemoragia boot no tanba kilat tiru to’o iha parte kakutak hodi halo ulun grave, nunee isin mate agora dadaun sei iha Ospitál Nasionál, atu hein halo autopsia, prosedimentu ne’ebé obrigatóriu no esensiál atu halo esplikasaun kompletu kona ba faktu sira.
“Depois de akontesementu, ekipa husi Laboratorium no forensic PNTL nian tun kedas ba fatin akontesementu atu halo levantamentu no kolekta evidénsia hotu-hotu, no mós halo registu fotográfiku no dokumentál iha fatin” dehan portavoz João Belo.
Hafoin, akontesimentu refere Polísia Nasionál Timor-Leste liu husi Departamentu Investigasaun Kriminal DSIC, komesa ona investigasaun kriminal formal, ho objetivu atu determina, ho rigor sirkunstánsia no motivu sira ne’ebé lidera ba akontesementu trájiku ne’e, evidénsia sira hanesan kilat ho munisoen inklui fatin akontesementu dadaun ne’e asegura hotu ona nune’e sei aprezenta ba ministeriu publiku.
