Reportajen David da Costa
Komunidade iha Ailoklaran, Aldeia Moris ba Dame, Suku Bairu-Pite, lamenta tanba durante fulan ida ho balun to’o besik fulan rua la asesu bee moos, ne’ebe obriga komunidade sosa bee husi kareta tanki ho folin entre US$25 to’o US$30 ba tanki ida. Situasaun ida ne’e afeta moris lor-loron, saúde, edukasaun labarik sira no ekonomia família, sira husu ba Governu no BTL-EP atu halo asaun lalais hodi restabelese fornesimentu bee moos.
Komunidade iha Ailoklaran, Aldeia Moris ba Dame, Joana de Oliveira Mendonça, hateten, durante fulan ida ho balun to’o besik fulan rua komunidade la asesu bee moos. Lor-loron komunidade tenke hadau malu bee husi mota, bee ida ne’e bainhira Bee Timor-Leste sira mai hamos bee tanki iha leten ne’e maka sira husik tun maim aka komunidade hadau malu, maibé ida ne’e mos loke tuir oras deit.
Dala ruma karte tanki maka lori bee moos mai faan, tanki ida entre US$25 ka US$30, no família ne’ebe iha osan mak bele sosa, no sira ne’ebe la iha osan labele hetan bee moos no komunidade balun hense pulsa ba sira ne’ebe bee sanio iha maka uza ida ne’e. Komunidade ne’e labarik barak mak ba eskola, maibé tanba falta bee moos sira hasoru difikuldade atu hetan bee ba haris no halo nesesidade lor-loron.
Tanba ne’e, komunidade husu ba autoridade kompetente sira atu lalais restabelese fornesimentu bee moos ba komunidade, tanba agora komunidade enfrenta difikuldade boot tebes tanba falta bee moos.
“Ema lori bee tanki mai faan iha US$25 ka US$30, ida ne’e ema iha osan maka bele sosa, ami laiha osan labele sosa. Ami iha ne’e labarik barak eskola, atu buka bee haris laiha, tanba ne’e husu ba sira, loke bee moos mai ami, tanba ami agora araska loos ba bee moos,” dehan Komunidade Aldeia Moris ba Dame, Suku Ailoklaran, Joana ba jornalista sira iha Sentru Juventude Moris ba Dame Ailoklaran, Sabadu 11/07.
Nune’e mos, Delegadu Aldeia Moris ba Dame iha, Suku Bairu-Pite, Hernani Baptista de Jesus Lopes Pereira, hateten, komunidade hato’o sira nia preokupasaun no deskontentamentu boot kona-ba problema fornesimentu bee moos ne’ebe to’o agora seidauk hetan rezolusaun.
Tanba durante fulan ida resin komunidade Aldeia Moris ba Dame tomak la asesu bee moos hodi responde ba nesesidade bazika lor-loron. Situasaun ida ne’e lori sofrimentu boot ba família sira, inklui labarik, feto, katuas no ferik sira, tanba bee moos mak nesesidade bazika no direitu fundamental ida ba ema hotu.
“Durante fulan ida resin ami nia komunidade Aldeia Moris Ba Dame la asesu bee moos, situasaun ida ne’e lori sofrimentu boot ba ami nia familia sira, labarik, feto, katuas no ferik sira tanba Bee moos mak nesesidade bazika no direitu fundamental ida ba ema hotu,”dehan Hernani.
Nia haktuir, iha ne’e komunidade barak maka sosa bee moos husi karteta tanki mai faan, no komunidade balun asesu bee husi komunidade balun ne’ebe maka iha bee privadu, no komunidade bainhira ba hense bee tenke hense pulsa listrika maka bele asesu bee husi viziñu sira, bainhira hense bee barak tenke hola pulsa mos ho montante ne’ebe boot, bainhira hense uituan entaun tuir ida ne’e.
Tanba ne’e, komunidade hanesan povu babain konsidera situasaun ida ne’e labele husik naruk tan. Falta bee moos la’os deit afeta saúde públika, maibé mos afeta dignidade komunidade, ekonomia familiar, edukasaun labarik sira no moris di’ak ba komunidade tomak.
komunidade husu ho firme ba Governu, ministériu no instituisaun kompetente sira, inklui BTL-EP, atu halo asaun imediata hodi restabelese fornesimentu bee moos fila-fali ba komunidade. Komunidade mos husu atu halo investigasaun klean kona-ba kauza problema ne’e no fó informasaun transparente ba komunidade, no responsabiliza parte ne’ebe iha obrigasaun atu garante servisu bee moos ba povu.
“Ami povu no komunidade ida ne’e, ho halerik ne’e ami hato’o ba ita boot sira, maibé ami atu defende ami nia direitu lejitimu hodi asesu bee moos, hanesan direitu baziku ida ba sidadaun hotu. Ami fiar katak, ho meius ida ne’e rona ami nia lian hodi to’o resposta no asaun konkreta ho lalais,” Hernani espresa nia sentimentu.
Nune’e mos komunidade husu ba Governu, Parlamentu Nasionál, PDHJ, sosiedade sivil sira atu fó atensaun ba situasaun ne’e, tanba bee moos laos previléjiu ida, maibé direitu baziku ida ne’ebe tenke hetan garantia ba sidadaun hotu.
Iha biban hanesan, sira mos husu ba BTL-EP atu fó resposta lalais kona-ba problema bee moos ne’ebe komunidade enfrenta hela. Komunidade mos husu ba BTL-EP atu fó esklaresimentu kona-ba razaun ne’ebe klaru tanba durante ne’e komunidade balun kontinua selu bee moos no balun la selu, maibé komunidade hotu-hotu hasoru nafatin problema bee moos maran.
No komunidade iha Aldeia Moris ba Dame, iha Suku Bairu-Pite, Postu Adminstrativu Don Alexo, Munsipiu Dili, hamutuk uma kain 500 resin ho 1,212 populasaun, ida ne’e seidauk konta ho komundade sira husi aldeia seluk mai hela iha ne’e.
