Reportazen Francisco JDA
Partidu Timor Forte (PATIFOR) simu notifikasaun hosi Tribunal Rekursu (TR), relasiona ho dokumentu partidu nian ne’ebe mak sedauk kompletu.
Liu hosi konferensia imprensa Prezidente Interinu PATIFOR, Gregorio Saldanha, “Mouris” informa ba jornalista sira katak Tribunal Rekursu husu PATIFOR hodi foti fali kaixa dokumentu sira, tanba inskrisaun partidu la tuir procedimentu admistrativu ka la priense rekejitus tuir lei haruka.
PATIFOR sei tun fali ba baze hodi kompleta kartaun eleitoral ka formulario registu orijinál balun, ne’ebé lakon no la hetan legalizasaun hosi Ministeriu Justica no Diresaun Nasionál do Registu Notariadu.
Gregorio Saldanha “Mouris” reforsa tan PATIFOR nudar kandidatu partidu polítiku hatama nia rekerimentu inskrisaun ho kartaun eleitoral hamutuk 33.025 ba Ministeriu Justica, maibé ikus mai indefere fali no husu atu hadia rekejitus balun, maibé PATIFOR mós lamenta ho serbisu Diresaun Nasionál Serbisu Registu Notariadu, tanba durante prosesu triajen fulan tolu la notifika PATIFOR atu adia kedas sala ne’ebé mak iha, maibé infelismente Tribunal Rekursu mak tenki halo fali knaar hodi detekta falta sira ne’e.
“Rekejitus sira ne’e iha failansu tekniku ne’ebé presiza hadia balun, tanba la moos no la hetan legalizasaun, ami rona dehan ema la too, dokumentus barak demais implika serbisu balun la hotu tuir tempu. Ami nia konferensia ne’e atu orientá fali militantes ba buat sira ne’ebé mak falla, nune’e bele regista fali. Tribunal Rekursu temi Municipiu 7 mak ami presiza kompleta sira nia dadus, nune’e tenke la’o tuir Tribunal Rekursu nian”, dehan Gregorio Saldanha ” Mouris” iha Sede PATIFOR Farol, 02/02
Presidente Interinu PATIFOR realsa tan, “ami nia alvu mak tenke registu no kompleta rekejitus, tanba partidu hakarak kompleta dokumentu ho kualidade, nune’e bele hetan resposta diak no husu ba militantes sira mantein kalma”.
“Ha’u hakarak apela ba kuadrus militantes no simpatizantes PATIFOR, atu mantein kalma no neon metin hodi fó apoio nafatin ba estrutura interinu PATIFOR, hodi adia dokumentus sira ne’ebé sei kurang atu nune’e submete fali ba prosesu registu foun iha tempu badak”, dehan Moris
Nia konklui partidu sei fo orientasaun ba maluk Koordenador Regional no sei hatutan ba Koordenador municipal no delegasaun sira, hodi halo serbisu.
