Sekretariu Estadu Juventude no Desportu (SEJD), ohin (05/02), asina deklarasaun kumprimisiu ho Diretur Nasional nain 7 mak foin hetan nomeasaun tuir konfiansa Sekretariu Estadu nian, hodi lidera Diresaun Nasional sira ba fulan 6 nia laran.
“Kompromisu hirak ne’e mak sai hanesan baze avaliasaun ba Diresaun nia serbisu, hahu husi dirijente sira diresaun nian; Diretor Nasional no Chefe Departamentu to’o funsionariu sira,” kompromisu ne’e deklara.
Iha lian makloke asina kumprimisiu ne’e, Sekretariu Estadu Abrao Saldanha esplika intensaun hosi kumprimisiu ne’e no oinsa halo prosesu establese kumprimisiu ne’e hodi ikus mai bele asina hamutuk. Kumprimisiu ne’e sei sai nudar baze atu sukat serbisu Diresaun sira nian.
“Intensaun importante ida husi dokumentu ne’ebé mak Sekretariu Estadu asina ho dirijente sira ohin mak atu ajuda trasa objetivu sira ne’ebé mak SEJD hanesan instituisaun hakarak atu atinji iha fulan neen mai ne’e nia laran,” Sekretariu Estadu Abrão Saldanha esplika.
“Kumprimisiu ne’e prosesu konsensual entre Diretores ho hau. Kumprimisiu ne’e sai baze ba dezempenamentu fulan 6 nian. Governo fo fiar ba imi atu sai Diretur no Xefe, no governo husu saida imi fob a governo mak imi nia dezempenho”, Sekretariu Estadu Juventude no Desportu, Abrão Saldanha hatutan.
Sekretariu Estadu mos esplika katak Primeiru Ministru dehan dala hira ona kona ba tenke duni rezultadu. Kumprimisiu ida ne’e halo atu duni rezultadu.
“Ha’u fiar katak akordu ida ne’e sei ajuda dudu no haforte espíritu serbisu ekipa nian no hadiak liu tan sentidu de pertense iha SEJD hodi bele presta serbisu diak liu tan ba Estadu no ba povu,” Sekretariu Estadu konklui.
Dokumentu kompromisu ne’e deklara katak dirijente sira ho Sekretariu Estadu konkorda malu hodi hatuur atinjimentu sira ne’ebé mak dirijente sira ne’e atu atinji iha sira nia diresaun ka unidade idaidak, ne’ebé sei kontribui ba prestasaun serbisu SEJD nian. Kaer ba akordu ida ne’e mak dirijente sira hatur target no fahe serbisu ba sira nia chefe no funsionariu sira, ne’ebé sei sai sasukat ba sira nia prestasaun serbisu.
Kompromisu hirak ne’e mak sai hanesan baze avaliasaun ba Diresaun nia serbisu, hahu husi dirijente sira diresaun nian; Diretor Nasional no Chefe Departamentu to’o funsionariu sira. Ho ida ne’e, dirijente idaidak hatene ona ninia target rasik, nune’e diriji ninia ekipa no mós serbisu hamutuk ho ekipa seluk iha SEJD laran atu hetan duni rezultadu ne’ebé mak sira rasik identifika no kompromete an atu atinji.
