Reportazen Zevonia Vieira
Ministeriu Saude (MS) deteta tan kazu konfirmadu COVID-19 foun hamutuk 39, iha Dili kazu foun 37 no iha Ermera nain 2
Liu hosi komunikadu imprensa ne’ebe Neon Metin asesu, Centro Integradu Jestaun Krize (CIJK) iha loron 1 Abril, ba jornalista sira informa katak evolusaun surtu COVID-19 iha Dili deteta kazu foun, nune kazu detetadu ka pozitivu iha Munisipiu Dili husi loron 7 Marsu 2021, to’o ohin 1 Abril de 2021 hamutuk 493.
Ho nune’e, iha Munisipiu Dili, sei iha cluster 48 maka sei nafatin hatudu atividade hada’et tutan virus SARS-CoV-2, husi ema ida ba ema seluk, liu-liu iha Suku Madohi, Bebobuk, Fatuhada, Comoro, Bairro Pité, Motael, Kulu-Hun, Lahane Oriental, Becora.
Iha municipio Ermera ohin deteta kazu pozitivu nain 2, kazu pozitivu 2 ne’e halo viajen husi Dili ba Letefoho, iha loron 26 Marsu. Iha Dili, sira hela iha aldeia Golgota, Suku Comoro. Ekipa konjunta saúde sei buka-tuir hela kontaktu-besik sira hotu.
Dadus jeral ba loron 1 Abril nian kazu foun COVID-19 hamutuk 39, kazu rekuperadu 3 no total kazu ativu nain 451. Husi total kazu foun ohin iha mane 20, feto 19. Sintomátiku nain 4 no asintomátiku nain 35.
Husi horiseik mai ohin ema hamutuk halo teste PCR total 1228, inklui 137 testes ba ema ne’ebé halo pedidu atu hetan autorizasaun esepsionál hodi sai husi serka sanitária iha Munisipiu Dili.
