Reportazen Zevonia Vieira
Centru Integradu Jestaun Krize [CIJK] kontinua hatoo informasaun relasiona ho moras Covid-19 iha Timor-Leste, ba loron 21 Abril.
Relasiona ho suspeitu 1 ba moras Covid-19 iha municipio Aileu, portavoz CIJK, Dr. Sergio Lobo informa katak rezultadu teste negativu.
Tuir informasaun ne’ebe Neon Metin Rekolha iha loron 15 Abril hosi Diretor Centru Saude municipio Aileu, Julio Mendoca katak timoroan ne’e fila hosi nasaun afetadu Australia iha loron 2 Marsu.
“Nia mai iha loron 2 Marsu, kuaze fulan ida resin, tuir ita nia mata dalan kuandu mai fofoun halo kuarentena durante loron 14, maibe ita mos tenke hare ba tempu inkubasaun, dalaruma liu tiha loron 14, nia imunidade tun entaun hatudu sintomas . Ho nune ekipa centru saude Aileu Vila hare nia ho sintomas sira ne’ebe mosu no halo ona kuarentena ba nia tanba nia mai hosi nasaun afetadu”, hateten Diretor Julio.
Tuir Diretor Julio katak maluk timoroan ho nia konsiensia no vontade rasik mai aprezenta an iha centru saude aileu ohin, hodi halo konsulta, ho nune’e ekipa saude halo analize no deskonfia sintomas ne’ebe hatudu bele ba iha moras Covid-19, nune’e ita halo kuarentena iha centru saude Aileui Vila.
