Reportazen David da Costa Gusmao
Ministeriu Saude (MS), liu husi Sala Situasaun Centro Integradu Jestaun Krize (SS-CIJK) identifika ona eskola STM ho Mall Golgota atu sai fatin izolamentu ba pasiente COVID-19 ne’ebe mak ho kazu moderadu.
Ministra Saude (MS) no Koordenador liña Ministeriais ba COVID-19 iha Timor-Leste, Odete Maria Freitas Belo, informa katak sira identifika ona fatin tolu, atu sai sala isolamentu ba pasiente COVID-19 ne’ebe ho kazu moderadu.
“Ita identifika ona fatin tolu hanesan Eskola STM Becora iha Andar 2, Salaun STM nian ho Mall Golgota atu sai fatin isolamentu ba kazu moderadu,” esplika Ministra Odete ba jornalista sira bainhira remata enkontru ho Primeru Ministru (PM), Taur Matan Ruak iha nia rezidensia Farol, Tersa,11/05.
Nia haktuir sira halo ona levantamentu ba fatin 3 ne’e, maibe haree ba nia kustu la dun karun no agora hein halo deit rehabilitasaun.
“Fatin 3 ne’e sai izolamentu ba kazu moderadu ka sintomatiku, ita la fo dalan ba ema sira ne’ebe mak ho sintomas atu hela iha uma, no hau propoin atu la lori ema ho sintomas halo auto izolamentu,” nia dehan.
Nia haktuir tan iha komunidade balun husu atu halo deit auto izolamentu, maibe ekipa mediku sira nafatin halo kontrola ba sira, atu hatene lolos sira nia kondisaun.
