Reportajen David da Costa Gusmao
Relasiona joga kopa Euro 2020 ne’ebe orsida madrugada tuku 4:00 jogu entre Portugal ho Frances no Jerman ho Hungaria, Polisia Nasiónal Timor-Leste (PNTL) identifika ona fatin 10 iha kapital Dili, hodi halo pasa revista ba adeptus sira hahú hosi tuku 4 lorokraik atu nune’e labele halo barullu.
“Ita iha ona planu preparasaun ba ida orsida hahú tuku haat (4) ne’e ita nia ekipa sei halo pasa revista iha fatin 10 ne’ebé mak identifika ona, no ita husu para atu nune’e adeptus sira halo movimentu tenki kumpri regras kodigu estrada nian,”esplika Komandante PNTL Munisípiu Dili Superintendente Xefe Hendrique da Costa, ba jornalista sira iha Ministeriu Interior, Kaikoli,Kuarta 23/06.
Nia haktuir respeitu mós ema seluk nia direitu, la bele uza motor knaalpot kanu resin, gas double ne’e ema sira atu deskansa la diak, ba provoka halo barullu ne’e la diak.
“Hau husu atu ita mós respeita ema seluk nia simbolu, ema nia Bandeira iha ema nia nasaun ema respeita tebes, tanba ita fanatik ba iha jogadór baln ita uza sala fali ema nia simbolu ne’e, nafatin respeita ema seluk nia simbolu hanesan Bandeira Nasaun ne’e nian,”dehan nia.
Nia salienta PNTL sei nafatin halo atuasaun hanesan iha semana kotuk, prenda motor hamutuk 146 ne’ebé halo prosesu hotu ona no ida ne’e sei nafatin aplika iha eskuadra hotu iha Díli nian.
“Ita nafatin haforsa iha pasa revista nian, ekipa patrolio mobel hare mós ba iha komunidade balu nia uma mós estragu tanba balu lakon balu manan hodi ataka malu, tan ne’e mak ekipa patrolia mós lao atu atende kona ba ida ne’e nian,” tenik nia
Nune’e fatin 10 ne’ebé mak PNTL identifika ona ne’e segredu, la bele fó sai atu nune’e adeptu sira la bele hatene fatin ida ne’ebé mak polisia sira pasa revista.
