Reportajen Francisco JDA
Relasiona ho Timor-Leste nia Pozisaun iha Organizasaun Nasaun Unidas (ONU), iha Nova Yorke hodi halo votasaun ba rezolusaun Myanmar kona ba ditadura militár no violasaun Direitu Umanu, maibe Timor-Leste fo votu abstain sai diskusaun iha sosiedade nia leet.
Hafoin Forum Komunikasaun Feto Timor Leste (FOKUPERS) hala’o konferénsia imprensa liu hosi Koordenadór komersializasaun e Advokasia FOKUPERS, Natalia de Jesus Cesaltino afirma katak FOKUPERS sente triste no lamenta tebes ba desizaun Ministériu Negósiu Estranjeiru no Kooperasaun (MNEK) ne’ebé vota abstain ba rezolusaun ONU, kona ba mediasaun prevensaun konflitu iha Myanmar, ida ne’e hatudu katak sei fó impaktu parseria bilateral iha futuru.
“Rezolusaun iha nasaun unida, ne’ebé presiza tebes ita nia votu Solidariedade atu halo mediasaun ba prevensaun konflitu iha Myanmar atu salva ema rihun ba rihun inklui feto, labarik, no ema marjinalizadu ne’ebé oras ne’e moris susar no iha presaun, situasaun inseguru iha militár Myanmar nia ditadura, maibé ita vota abstensaun sein liu hosi prosesu konsulta ho ita nia superior sira, ida ne’e sei fó impaktu ba ita nia parseria bilateral iha futuru, liga ho Timor-Leste nia prosesu ba adezaun ASEAN no kestaun seluk iha ASEAN” hateten Koordenadór Konsensializasaun e Advokasia, Natalia de Jesus Cesaltino iha Salaun FOKUPERS, 23/06
Nia realsa tan Ministériu Negósiu Estranjeiru no Kooperasaun ( MNEC) mak trai Konstituisaun da Repúblika iha artigu 8 relasaun internasionál iha pontu 2 no 4, artigu 9 Simu direitu internasionál pontu 1,2 no 3, Artigu 10 Solidariedade pontu 1, nune’e trai mós estadu Timor-Leste nia kompromisu ba tratadu internasionál sira ne’ebé Timor leste Ratifika ona, FOKUPERS lamenta tebes ba erru ne’ebé MNEK komete, tanba votu la reprezenta povu TL nia solidáriu ba povu Myanmar.
“Ami rekomenda ba Prezidente Repúblika atu labele akontese tan, maibé tenke iha hirarkia governu nia ne’ebé tenke halo konsultasaun, no kooperasaun serbisu iha interna, atu bainhira fó rezultadu ida iha altu nivel presiza reprezenta povu Timor tanba la’os lori individual mak tur iha ne’eba, maibé lori nasaun mak tur iha ne’ebá,” hateten Natalia de Jesus Cesaltino
