Reportajen Santina Lucia da Costa
Prezidente Republika Dr. Francisco Guterres Lu-Olo halo enkontru ho membru Konsellu Superior Defeza no Seguransa (KSDS) ho Konsellu Estadu (KE), hodi extende Estadu Emerjensia (EE) ba dala-15, tanba dadaun ne’e virus Delta hahu tama ona iha nasaun vizinho Indonesia.
Hafoin enkontru ba jornalista sira Xefe Casa Sivíl, Francisco Maria de Vasconcelos informa katak Konsellu Superior Defeza no Seguransa (KSDS) ho Konsellu Estadu (KE) enkontru hotu ona, tanba pedidu governu nian mai Prezidente Repúblika atu husu ba Parlamentu Nasionál (PN) atu renova Estadu Emerjensia (EE).
“Informasaun ne’ebé mak ita simu katak, virus delta mos hahu tama iha indonesia, tanba ne’e mak ohin Governu halo pedidu mai, Konsellu rua ne’e reuni ona, no rekomenda ba Prezidente Republika atu hato’o ba Parlamentu Nasional atu bele diskuti aprova ka la aprova, se aprova, Prezidente Republika sei publika iha jornal da republika. Pedidu ne’e sei haruka ba PN se tarde liu aban, mais tenta posivel ohin atu lori ba PN,” hateten, Xefe Casa Sivil, Francisco Maria de Vasconselhos iha Palasiu Prezidensial Nicolau Lobato, Bairu-Pite, 28/6.
Xefe Casa Sivil dehan nia medidas nafatin hanesan EE uluk, mais konsiderasaun boot liu mak agora dadaun ne’e virus delta ho Alfa ne’ebé mak komesa espalla iha nasaun barak ona.
Francisco Maria de Vasconcelos hatutan medidas sira haruka ba PN aprova, Prezidente Repúblika dekreta, medidas sira ne’e governu mak tenke responsabilidade atu halo dekretu ida kona-ba oinsa implementa EE iha territóriu tomak, liuliu iha fronteira terestre, tasi no mós aviaun.
Iha fatin hanesan Diretór Ezekutivu FONGTIL, Daniel dos Santos hateten, sosiedade sivíl nia prezensa ne’e hanesan observadór, depois iha oportunidade ita bele fo hanoin ruma liga ho pedidu governu nian estensaun estadu emerjensia, dala-15.
Agora buat ruma ne’ebe ami kestiona maka ita iha estadu emerjensia depois ita foin dada de’it konfinamentu obrigaroriu, ita ninia Polisia Nasional Timor-Leste (PNTL) sira la kontrola másimu, fim semana ema halo ona festa aglomerasaun.
Nia akresenta variante foun iha Indonesia, ida ne’e perigu, agora ita halo hela esforsu, governu nian atu vasina, agora ita foin aselera oituan, variante foun mosu, entaun oinsa maka ita nia PNTL sira bele halo kontrola didi’ak ba aktividade englomerasaun, liuliu festa sira ne’e.
“Husu ba PNTL haree ba ida ne’e, konfinamentu obrigatoriu mak laiha maibé serka sanitaria sei lao hela, ita haree membru PNTL nia knar di’ak oinsa atu asegura englomerasaun no atividade sira halibur ema barak,” Daniel rekomenda
No nia mós husu ba governu oinsa kontrola masimu iha fronteira, se virus Delta ne’e tama iha Kupang ita tahan la biban. Governu entermus de ekipamentu iha, soke ita nia problema atu tahan variante delta ne’e mak ita tenke kontrola másimu iha fronteira, tamba ida ne’e mak ita preokupa.
