Reportajen David da Costa Gusmao
World Vision iha Timor-Leste, liu hosi Komisaun Direitu ba Labarik iha Timor-Leste (KDLTL) apoiu material eskola hamutuk 500 no mos material ijiene hamutuk 500 ba labarik sira ne’ebe afeitadu hosi inundasaun iha loron 4 Abril liu ba.
Diretora World Vision iha Timor – Leste, Migena Shulla hateten, World Vision nu’udar organizasaun ida ne’ebe mos, serbisu ba atu hadia labarik sira nia situasaun moris iha uma laran, komunidade no sosiedade. World Vision serbisu ho parseiru barak atu atinji mehi ida ne’ebe diak ba labarik iha Timor-Leste, Komisaun Direitu ba Labarik Timor-Leste nu’udar parseiru importante tebes ba World Vision no hala’o kolaborasaun iha atividade barak ne’ebe relasiona ho labarik iha tinan barak.
“Ohin loron World Vision kontinua servisu hamutuk nafatin ho Komisaun Direitu ba Labarik liu husi entrega material eskola nian no mos material ijiene nian, atu bele apoiu netik labarik hirak ne’ebe foin lalais ne’e hasoru kalamidade iha loron 4 Abril liu ba,” dehan Diretora World Vision Migena, ihe Edifisiu World Vision Bidau, Segunda, 28/06.
Nia haktuir, Ida ne’e apoio ki’ik ida husi World Vision maibe bele hakma’an netik todan no difikuldade ne’ebe familia barak hasoru, liu – liu labarik sira.
“Ha’u apresia tebes ba kolaborasaun no parseria ne’ebe la’o di’ak tebes ho Komisaun Direitu ba Labarik . World Vision iha nafatin komprimisiu atu kontinua serbisu hamutuk ho Komisaun Direitu ba Labarik,” tenik nia
Iha fatin hanesan Diretora Ezekutivu, Komisaun Direitu ba Labarik iha Timor-Leste, Dinorah Granadeiro, hateten tuir pedidu ne’ebé mak KDLTL hatama ba iha World Vision ne’e labraik sira hamutuk 250, maibe depende pakote ne’ebé mak sira oferese agora ne’e.
“Normalmente ita fahe pakote sira ne’e, kada labrika ida fo pakote ida. Entaun school kid nian se sira mai ho pakote ketak-ketak ona entaun ita fahe kada labarik pakote ida ne’ebá mos ijiene kid ne’e mos ita fahe labarik ida pakote ida, depende mos pakote sira ne’ebe mak fo mai,” esplika Diretora KDLTL Dinorah.
Nia haktuir tuir plano sei fahe deit ba iha Dili laran, maibe la taka dalan ba munisipiu sira, iha posibilidade munisipiu balun ne’ebe mak presiza no sira liga mai iha KDLTL, komisaun mos se fo apoio, depende mos ba pakote ne’ebe mak iha komisaun nian.
“Normalmente serbisu sira ne’e iha MSSI ho SEPS mak halo, maibe iha asuntu espesífiku balun ne’ebé fokus ba labarik sira, ita sempre serbisu hamutuk ho ita nia parseiru oinsa atu bele apoiu no hakma’an sira nia sofrementu ne’e,” nia subliña.
Tuir dadus huis Ministero Solidaridade Sosial no Inklizaun (MSSI) katak labarik sira ne’ebé mak afeitadu ba dezastre natural iha Dili hamutuk 2 mill resin.
