Reportajen Joselina dos Santos
Prezidente da Tane Konsumidor, Antonio Ramos da Silva ho Reitór Universidade Nasionál Timor-Lorosa’e (UNTL), João Soares Martins no orgaun Komunikasaun Sosiál, realiza serimonia asinatura Protokolu Kooperasaun entre Asosiasaun Tane Konsumidor Ho Universidade Nasionál Timor-Lorosa’e nian.
Hafoin seremonia asinatura, Prezidente da Tane Konsumidor Antonio Ramos da Silva hateten Tane Konsumidor serbisu hamutuk ho Estudante estaziada UNTL, Faculdade Siénsia Sosiál (FCS), Departamentu Komunikasaun Sosiál (CS) hala’o estajiu iha area rurais.
“Ami simu Estudante UNTL liu-liu Departamentu Komunikasaun Sosiál, estájiu iha ami nia fatin durante fulan 3 no kontinua nafatin ba oin no halo peskiza konaba oinsa mak foti folin sasán sira iha Dili laran,” dehan Prezidente da Tane Konsumidór António Ramos da Silva ba Jornalista sira Iha Kampus Central UNTL, 08/07.
Prezidente Tane Konsumidor esplika katak objetivu husi peskiza ne’e atu hatene kona-ba kualidade sasan no folin sasan ne’ebé mak sira fornese ba konsumidór siram ho metodolojia sira ne’ebé mak sira halo ona no traballu seluk maka halo produsaun audiu vizual.
“Esperansa ba ami mak faktus ne’ebé ami halo avaliasaun katak ita nia Universidade mos bele domina formasaun kualidade ne’e, no ami avalia husi resultadu nomos fornese nafatin informasaun kona-ba lei direitu do konsumu,” dehan Prezidente Tane Konsumidor.
Iha fatin hanesan, Reitór UNTL, João Soares Martins hateten Tane utiliza ona rekursu UNTL nian, estudante husi Komunikasaun Sosiál ne’ebé mak ajuda tebes iha sira nia programa ba UNTL, tuir ha’u nia intervensaun katak direitu konsumidór ne’e importante tebes, asegura saúde públika, kondisaun enjeral no konsumidór sira iha direitu atu sosa tuir buat ne’ebé eziste.
Diretór Departamentu Komunikasaun Sosiál, Marcelino X. Magno informa asina memoradu bem-intendimentu entre UNTL ho TANE Konsumidór hanesan simbolikamente hodi rekoñese katak durante ne’e Departamentu Komunikasaun Sosiál serbisu hamutuk ho Tane Konsumidór iha área advokasia ba direitu konsumidór ne’ebé mak halo iha Fakuldade no peskiza.
“Nu’udar Xefe Departamentu ha’u orgullu tebes ba Estudante Deparmento Comunicação Sosial maske sira eskola seidauk hotu, maibé kuaze sira nia produtu ne’ebé fo sai hetan apresiasaun husi nivel Europeia no parte balun hetan apresiasaun husi Ajensia Internasional UNICEF-UNESCO, maibé tenke serbisu no estuda tan para avansa ba oin ,” dehan Marcelino
Estudante hamutuk nain 4 mak ba sei halo estajiu iha Tane Konsumidór no sira produs video 7, apoiu husi Uniaun Europeia no DECO Portugal no sira públika duni iha pajina Tane Konsumidór nian.
Estudante estaziada Departamentu Komunikasaun Sosiál, Luis A. Ximenes hateten atividade sira ne’ebé mak durante ne’e sira hala’o, Tane Konsumidór sira fo programa liu-liu iha Audio Vizual nian, no mos apoiu sira ba peskiza iha loja sira Dili laran, no mos ba UNPAZ to’o Baucau kona-ba direitu konsumidór nian, oinsá konsumidór sira utiliza sira nia direitu.
