Reportajen Santina Lucia da Costa
Primeiru Ministru Taur Matan Ruak enkoraja komunidade Munisípiu Ermera partisipa iha kampaña vasina hodi kombate COVID-19, tanba munisípiu ne’ebé hetan vasina ki’ik liu mak Ermera ho 12% de’it.
Hafoin enkontru ho Prezidente Republika, ba jornalista sira Primeiru Ministru hateten Serka Sanitaria ba munisípiu Ermera ne’e dalan ida evita atu moras ne’e labele da’et ba munisípiu sira seluk, maibé ita hatene katak, populasaun Ermera ne’e depende liu ba kafé, tanba ne’e governu mós tau hela matan ba ida ne’e, tuir posibilidade ne’ebé mak ita iha, konserteza tenke tau atensaun ba ita nia populasaun sira.
“Governu husu no hau pesoalmente husu ba ita nia inan-aman sira tenke partisipa iha kampaña vasinasaun, tanba Ermera ikus liu, munisípiu ne’ebé hetan vasina ki’ik liu mak Ermera, 12% de’it, por ezemplu, hanesan munisípiu Viqueque ne’e segundu lugar tuir Dili.” informa Taur Matan Ruak ba jornalista sira hafoin enkontru ho Xefe Estadu iha Palasiu Prezidensial, Bairo-Pite, 5/8.
Xefe governu ne’e enkoraja populasaun munisípiu Ermera, dalan di’ak atu kombate moras Covid-19 mak tenke simu vasina.
“Ita sei iha vasina sufisiente para fó ba ita nia sidadaun sira, ita boot sira haree medidas ne’ebé governu hasai ne’e, ema ne’ebé simu ona vasina dala rua ne’e livre.” dehan Taur Matan Ruak.
Taur hatutan hanesan variante Delta agora ita preokupa los, tanba iha ona nasaun Viziñu Indonesia no Timor-Leste mós rejista ona kazu pozitivu balunm tanba ne’e mak kontinua enkoraja sira para simu vasina ne’e importante.
Entretantu tuir dadus Munisipiu Ermera, Ministeriu Saude deteta kazu ativu foun iha loron 5 Agostu hamutuk 27, kazu ativu 616, kazu rekuperadu 147 no kumulativu kazu konfirmandu hamutuk 763
