Reportajen David da Costa Gusmao
Ministeriu Saude (MS) liu husi Sala Situasaun Centru Integradu Jestaun Krize (SS-CIJK) ohin rejista tan timoroan na’in 1 mate ho Covid-19 iha izolamentu Vera Cruz, kazu foun ohin 187, iha Dili 77 no iha Munisipiu Manufahi 63 no Munisipiu seluk 47.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo informa, ohin loron 23 Agostu deteta kazu foun hamutuk ema nain 187, iha Dili 77 no Covalima nain 63, Aileu nain 5, Ainaro nain 8, Baucau nain 6, Bobonaro nain 3, Ermera nain 4, Lautem nain 6, Manatuto nain 2, Manfuhai nain 3, no Viqueque nain 8 no munisipiu rua ohin laiha kazu foun mak Liquiça no RAEOA.
Nia haktuir tan husi kazu detetadu foun ohin 40 (21,3%) iha ona vasina kompletu no 56 (30,0%) hetan ona vasina doze dahuluk.
Nune’e mos ohin iha kazu rekuperadu ne’ebé hamutuk ema nain 67. Total kazu ativu iha izolamentu ohin hamutuk ema nain 3.383, total kazu konfirmadu kumulativu sura husi 21 Marsu 2020 to’o mai ohin loron 23 Agostu tinan ne’e hamutuk ema nain 14.403.
Dr. Rui dehan ohin mos iha óbitu mane nain 1, idade 68 timoroan, hela iha Gleno Ermera, iha 16 Agostu 2021, diagnóstikadu COVID-19 (PCR pozitivu, CT Egene 22, N2gene 24,7), iha Gleno, Ermera, no hahú halo izolamentu iha 17 Agostu 2021.
Nia salienta matebian mós iha problema ipertensaun. Hahú 17 Agostu, Matebian ninia saturasaun oksijnio la normal, no hahú hatudu sinál sindroma insufisiénsia respiratória aguda (SIRA), maibématebian ho familia lakohi atu transfere mai halo tratamentu iha Dili no iha madrugada matebian isin manas, saturasaun oksijéniu tuun maka’as no matebian ohin iis-kotu iha oras 11:20 dader.
Nia dehan tan ohin familia la aseita halo funeral tuir protokolu ne’ebe adopta iha Timor-Leste.
