Reportajen Santina Lucia da Costa
Relasiona ho Komisaun Anti-Korrupsaun (CAC) ne’ebe halo investigasaun ba Ró Tranship II, tuir monitorizasaun Lalenok Ba Ema Hotu (LABEH) katak CAC seidauk halo investigasaun profundu ba asuntu ne’e, no LABEH la satisfás ba prosesu aluga Ró Tranship II.
Liuhusi konferénsia imprensa Diretór Ezekutivu Lalenok Ba Ema Hotu (LABEH), Cristopher Hanry Samson hateten prosesu Ministru Transporte no Komunikasaun (MTC) aluga Ró Tranship II, ne’ebé sai nu’udar konsume públiku, ne’ebé obriga instituisaun estadu sira, organizasaun sosiedade sivil sira, inklui mós Komisaun anti-korrupsaun (CAC) hodi tun ba iha térenu halo investigasaun ba Ró Tranship II.
” LABEH senti la satisfás ba prosesu aluga Ró Tranship II, no investigasaun ne’ebé la’o daudauk, tuir monitorizasaun LABEH haree katak, CAC seidauk halo investigasaun profundu ba asuntu ida ne’e.” hateten Diretór LABEH, Cristopher Hanry Samson, ba jornalista sira iha Salaun LABEH, Kampun Baru, Comoro, 25/8.
LABEH ezije CAC atu halo investigasaun profundu ba iha prosesu tomak, kona-ba tanba sá maka MTC bele aluga Ró Tranship II ne’ebé tula pasajeiru husi Dili ba Atauro, no husi Atauro ba Oecusse, iha tempu Estadu Emerjénsia. Situasaun ida ne’e, kontradís tebes ba desizaun Konsellu Ministru (KM)
Diretór LABEH haktuir iha Monitorizasaun LABEH nian, MTC fó sai públiku katak desizaun ne’ebé nia hola tanba hetan aprovasaun iha Konsellu Ministru, no Konsellu Ministru aprova para aluga Ró, tanba ne’e maka MTC aluga Ró Tranship II, maibé investigasaun ne’ebé mai husi CAC seidauk halo investigasaun ba Konsellu Ministru tomak, tanba sá mak Konsellu Ministru hola desizaun ne’ebé kontradís nia-an rasik.
Cristopher hatutan CAC presiza halo investigasaun husi desizaun ne’ebé Konsellu Ministru rasik halo, labele iha double stander katak, governu ko’alia buat seluk, no governu halo buat seluk, se los duni governu mak aprova hodi hola Ró, ita bele dehan katak MTC implementa hela desizaun ne’ebé Konsellu Ministru halo, ho nune’e CAC tenke halo investigasaun ba desizaun Konsellu Ministru nian, hodi hatene lolos KM duni maka halo duni desizaun ida ne’e ka lae.
Nia esplika iha departamentu Marítima, ida seluk ne’ebe kontrolu ba Portu, kada ida-idak iha nia funsaun, portu maka halo prosesu oinsá maka bele hetan Ró ka aluga Ró, enkuantu Marítima maka halo prosesu oinsá para Ró bele tama, labele haluha katak, Ró Nakroma durante fulan hira nia laran, para hela iha ne’eba, tanba saida mak Ró Nakroma labele halo manutensaun
Nia haktuir, labele ho ema ida iha interese rasik para kontra lei ne’ebé eziste, tanba ne’e mak husu ba investigasaun sira ne’ebé investiga ida ne’e atu para hatene se mak iha kotuk, se mak obriga tenke aluga Ró ne’e iha momentu ida ne’e, se mak hetan benefísiu husi Ró ida ne’e, hahú husi pedidu se mak halo hodi hetan Ró ida ne’e nia intensaun saida.
Nia reforsa LABEH lakohi timoroan ida sai tan vítima tanba lei, se diretór sira ne’ebé serbisu iha ne’eba hetan orientasaun husi Ministru, hetan orientasaun husi ema boot, investiga ema ne’ebé fó prosesu ne’e, “labele ba investiga fali ki’ikoan sira iha Ministériu nia laran ne’ebé submete de’it desizaun husi nia boot sira, agora ema boot sira ema la kaer ida”.
