Reportazen Santina Lucia da Costa
“Se wainhira la trata ami nia preokupasaun sira ne’e maka ami oan 500 resin ne’e la arranka ba serbisu iha Korea do súl, ami sei organiza malu hodi halo manifestasaun hasoru parte kompetente”. Filipe
Kandidatu traballadór timoroan hamutuk 500 resin ne’ebé atu ba serbisu iha Korea do Sul, husu governu atu aselera prosesu sira lalais, hodi nune’e sira ba serbisu, tanba kandidatu sira hein besik tinan rua ona.
Ba jornalista sira, Porta-Voz kandidatu traballadór, Filipe Hau Kotorze hateten, juventude ne’ebé mak durante ne’e tuir kursu lian Korea, no tuir ona ezame iha sistema EPS lian Korea nian, iha tinan 2019 no 2020 nian, ne’ebé pasa ona sai hanesan kandidatu Traballadór Timor-Leste nian atu ba serbisu iha Korea do Súl, to’o agora seidauk dezloka atu ba serbisu besik tinan rua ona,
Filipe haktuir Diretór jerál SEFOPE, Paul Alves ne’ebé fo sai iha media GMNTV no TVE iha fulan 2 liu ba katak, kandidatu traballadór Timor-Leste nian molok to’o iha fulan Dezembru sei dezloka hotu ona ba Korea do Sul, maibé realidade seidauk hatudu data serteza atu dezloka.
Nia hatutan Diretór jerál, Paul Alves mos hateten katak Traballadór Timor-Leste ne’ebé mak atu aranka ba korea tenki tuir rekezitus balun ne’ebé mak Governu Korea haruka mai, katak halo test swab no kuarentena durante loron 14 iha fatin izolamentu molok dezloka ba Korea súl.
“Ami prontu atu halo tuir rekizitu hirak hotu, ne’e duni ami husu Governu atu aselera ami nia prosesu ho lalais, liu-liu SEFOPE ho ninia estrutura hotu, atu servisu maka’as hodi alkansa objetivu ne’ebé mak ami hakarak.”hateten Porta-Voz Filipe Hau Kotorze, iha Sentru Kursu Lian Korea, Becora, 15/9.
Nia informa ko’alia kona-ba osan atu selu aviaun nian, to’o agora Traballadór timoroan ne’ebé maka atu arranka ba Korea hodi serbisu seidauk husu osan ba Governu, maibé hasai rasik osan $2,000.00 to’o $3,000,00 dollar Amerikanu.
Nia afirma tuir regulamentu EPS Korea, Traballadór sira ne’ebé mak hetan ona kontratu husi Governu Korea durasaun ou válidu to’o tinan 2 de’it, se kuandu patraun kansela ba kontratu maka labele ba serbisu iha Korea.
“Se wainhira la trata ami nia preokupasaun sira ne’e maka ami oan 500 resin ne’e la arranka ba serbisu iha Korea do súl, ami sei organiza malu hodi halo manifestasaun hasoru parte kompetente.”dehan Filipe
Nia akresenta ba servisu iha Korea la’os di’ak ba ami nia-an de’it, maibé di’ak mós ba Governu, no estadu Timor-Leste nian, hodi hamenus dezempregu rai-laran, no hodi hadi’a Kresimentu ekonomia moris família nian.
Filipe mos husu ba Embaixadór Korea iha TL, Primeiru Ministru, Taur Matan Ruak ho membru governu hotu liuliu SEFOPE, MNEK, MTTC no Ministeru Saude atu aselera prosesu sira hodi desloka lalais ba Korea do Sul.
Entretantu Diretór Nasionál, Diresaun Nasionál Empregu Exterior (DN-DNEE), Filomeno Soares hateten Governu liu husi SEFOPE ninia papél importante liu mak atu halo kontratu ba Traballadór sira iha rai liur, tantu ba Australia no Korea, maibé agora daudauk mosu surtu Covid-19 ne’e, mobilizasaun traballadór kuaze paradu hotu, la’os ita mak lakohi haruka ba.
Diretór Nasionál DNEE, esplika ema nia nasaun mós hetan Lockdown tanba Korea mós sai knuuk ba Covid-19, problema segundu mak ita laiha aviaun komersiál ida, depois la regular ida ne’e mak problema boot ba ita.
Filomeno hateten maibe SEFOPE sempre iha koordenasaun serbisu entre Ministeriu Justisa, MNEK, reprezentante adidu traballadór iha Korea, no mós Australia, no embaixadór sira, sempre komunika ba mai atu bele relata informasaun los, oinsá mak apoiu joven sira.
Nia afirma daudaun ne’e kandidatu traballadór kontratu foun ne’ebé tama husi Korea hamutuk 500 resin.
Nia jusu joven sira ne’ebé nia naran tama iha sistema pasiénsia uitoan hodi hein, “ami mos serbisu ba ida ne’e, imi nia ezijénsia labele aas liu fali ami, tanba ami la’os fó serbisu maibe empregador Korea ho Australia mak fó serbisu,
