Reportajen Francisco JDA
Parlamentu Nasionál (PN) hato’o omenajen ikus ba saudozu José António Gomes da Costa Ma’Huno Bulerek Karataiano’ ne’ebe preside husi Prezidente Parlamentu Nasionál, Aniceto Guterres iha Plenaria ho ajenda unika, ba Saudozu Ma’Huno hakotu is iha loron 24 Setembro 2021, nune’e Timor-Leste deside lutu metan ba Saudozu Ma’Huno nia mate.
Iha votu omenajen ba saudozu Ma’Huno tuir deputadu Bankada PUDD, deputadu António de Sa Benevides iha intervensaun hatete katak ohin ema hotu laran triste no nakonu ho matan been no triste tebes tanba lakon eroi boot ba luta naruk, ne’ebé saudozu halo ba rai ida ne’e labele sukat ho metro no dasi.
“Ita hotu triste tanba lakon ita nia eroi boot, eroi ne’ebé iha unidade no moris simples , eroi ne’ebé hamnasa ba ema hotu no respeitu ema hotu, eroi ne’ebé iha fuan boot ba autodeterminasaun, ho espíritu nasionalizmu no patriotizmu lori ona ita ba ukun rasik an” hateten António de Sa Benevides iha Parlamentu Nasionál ( PN) 27/09
Iha fatin hanesan Xefe Bankada PLP, Maria Anjelica Sarmento iha intervensaun hatete saudozu Ma’ Huno nia luta hahú kedas iha 1974, hodi hamutuk ho saudozu sira seluk harii ASDT no sai mós Co Fundadór ba FRETILIN maski Saudozu nia isin la hamutuk ona ita.
“Hakarak hato’o ami nia omenajen ikus, hodi agradese saudozu nia luta, ne’ebé ohin loron ami hotu hamriik goza iha nasaun ida Repúblika Demokratika Timor-Leste” hatete Xefe Bankada PLP, iha Parlamentu Nasionál.
