Home Notisia Presija Aplika Prinsipiu Uma Adekuadu no Haktuir Lei Espropriasaun, Sekarik Implementa Realojamentu

Presija Aplika Prinsipiu Uma Adekuadu no Haktuir Lei Espropriasaun, Sekarik Implementa Realojamentu

790
0
Oxfam iha Timor-Leste halo konferensia imprensa. [Foto: Media Oxfam | 28.09.2021]

Reportajen Francisco JDA

“Sosializa mós Lei ba Rai nú.13/2017 no Lei Espropriasaun nú.8/2017 atu proteje no asegura komunidade sira nia direitu ba rai no hela fatin, liu-liu ba grupu vulneravel sira mak hanesan feto, labarik, ferik-katuas, ema ho defisiénsia, agrikultór no peskadór sira ho rendimentu ki’ik ne’ebé depende makaas ba rai hodi sustenta moris”. Ines Martins

Relasiona ho planu governu nian atu harii re-alojmentu ba komunidade afetadu sira husi dezastre naturais ne’ebe akontese iha loron 4 Abril 2021, ne’ebe estraga komunidade sira nia uma, rai agrikola no infraestrutura no iha situasaun propagasaun COVID-19

Liuhusi konferensia imprensa Oxfam iha Timor-Leste hato’o rekomendasaun ba VIII Governu Konstituisional, atu prioritiza opsaun reabilita uma ne’ebe destruidu duke harii re-alojamentu, liu-liu ba komunidade sira ne’ebé la hela iha area risku.

Tuir Oxfam katak sewainhira laiha ona opsaun seluk no tenke harii duni realojamentu, prosesu sira ba re-alojamentu tenke kumpri prosesu no prinsípiu sira ne’ebé estabelese ona iha Lei Espropriasaun nú. 8/2017.

Liuhusi konferensia imprensa, Asesora ba Feto no Rai iha Oxfam Timor-Leste, Ines Martins ba jornalista sira hateten katak Oxfam rekomenda ba governu atu sosializa lei sira hanesan Lei Área Protejida no Lei Protesaun Sivíl, konaba área sira ne’ebé risku ba hela fatin. Sosializa mós Lei ba Rai nú.13/2017 no Lei Espropriasaun nú.8/2017 atu proteje no asegura komunidade sira nia direitu ba rai no hela fatin, liu-liu ba grupu vulneravel sira mak hanesan feto, labarik, ferik-katuas, ema ho defisiénsia, agrikultór no peskadór sira ho rendimentu ki’ik ne’ebé depende makaas ba rai hodi sustenta moris, waihira Governu atu implementa re-alojamentu ka sentru akollementu.

Ines mos hatutan bainhira governu harii re-alojamentu ka reabilita uma komunidade sira ne’ebe destruidu, governu presija promove no haktuir prinsípiu hitu kona-ba uma adekuadu tuir padraun internasaional mak hanesan uma labele karun liu, uma tenke natoon seguru no mós asegura privasidade, uma tenke iha asesu ba oportunidade vida moris no rekursu xave sira (por ezemplu klínika, merkadu no seluk tan), uma tenke apropriadu tuir kultura ema nian, uma tenke asesivel no entrega la ho diskriminasaun, uma tenke iha asesu ba nesesidade báziku sira (bee moos, hariis fatin, ahi no seluk tan) no estadu tenke rekoñese no fó direitu legal klaru ba ema nia hela fatin hodi sira sente seguru no la bele hasoru despeju arbiru.

Ba asuntu refere Oxfam iha Timor-Leste fó apoiu direta ba Sekretáriu Estadu Protesaun Sivíl, liuhusi diresaun Protesaun Sivíl, atu halo servisu mak efetivu no efisiente hodi fó asisténsia ba komunidade afetadu sira. Alende ne’e, Oxfam halo análize legál no hato’o rekomendasaun ba Governu hodi konsidera bainhira halo desizaun ba polítika no dezenvolve planu sira atu implementa re-alojamentu.

Oxfam mos halo ona enkontru ho Diretór Jeral Protesaun Sivil Superintendente Asistente Polisia, Ismail da Costa Babo, Ministru Prezidénsia Konsellu Ministru, Fidelis Leite Magalhaes, Sekretáriu Terras no Propriedade, Mario Ximenes no mós ho Ministru Planu no Ordenamentu no Vice Primeiru Ministru, Jose Reis hodi rekomenda ba Governu katak prosesu re-alojamentu kumpre lei no komunidade nia direitu ba rai liu-liu Lei Espropriasaun nú. 8/2017.

Iha enkontru refere governu rasik buka ona solusaun tempu naruk, hodi kria komisaun ida hodi dezenvolve estratéjia no programa ba harii re-alojamentu. Solusaun ne’ebé komisaun ne’e propoin tenke asesivel, sustentável, no reziliente ba mudansa klimátika no inkluzivu. Governu identifika ona fatin harii re-alojamentu mak hanesan Hera-Hali Dolar, Metinaru, Beduku, Tibar no Merkadu Comoro. Dadus atualizadu husi loron 10 Setembru 2021, ne’ebé akumuladu husi Sekretáriu Estadu Protesaun Sivil (SEPS), hatudu katak iha Dili laran sei iha sentru evakuasaun hamutuk 6 ne’ebé sei ativa, ho uma kain hamutuk 131, ho total membru família na’in 701.

Print Friendly, PDF & Email

LEAVE A REPLY

Please enter your comment!
Please enter your name here