Home Notisia Tomas Cabral Reprezentante Special ba Guine-Bisau, Governo Sei Gasta Tan Osan

Tomas Cabral Reprezentante Special ba Guine-Bisau, Governo Sei Gasta Tan Osan

1982
0
Tomas Cabral (foto: RTTL)

Iha 2014, Governo Timor-Leste fo tiha ona osan USD 6 Miloens hodi selu funsionariu publiku iha Guine-Bisau. Loron tolu liuba, Governo nomea ona Reprezentante Special Timor-Leste ba Guine-Bisau, Tomas Cabral, hodi halo identifikasaun ba nesesidades eleisaun iha Guine-Bisau. Osan hira tan mak atu gasta ba Guine-Bisau? Oinsa ho debe sira mak Timor-Leste presija selu?

Iha, 21 Augustu 2018, Konsellu Ministru aprova Resolusaun Governo ida hosi Ministru Negosiu Entranjeiru no Kooperasaun Dionisio da Costa Babo Soares, hodi hili Tomás Cabral nudar Reprezentante Special Governo Timor-Leste nian ba Republika Guine-Bisau. Tomas Cabral sei ba halo identifikasaun ba nesesidade estadu Guine-Bisaun nian hodi halao eleisaun ho livre no demokratiku iha 18 Novembro 2018. Aktu ida ne’e nudar kontribuisaun Timor-Leste ba nasaun Guine-Bisau nia prosesu eleisaun iha 2013 no 2014. Aktu ida ne’e mos konsidera nudar Timor-Leste nia kontribuisaun ba seguransa no dame iha mundo  liu hosi fo suporta ba konsolidasaun demokrasia, respeitu dereitus umanu no hametin estadu. Buat hirak ne’e hotu mak lalok relasaun internasional Timor-Leste nian hodi mantein relasaun amizade ho rai sira seluk, liliu rai sira CPLP.

Ho razaun hametin lasu fraternidade entre povo Timor-Leste ho povo Guine-Bisau, iha 2014, Premeiru Ministru Xanana Gusmao, publika tiha despacho ida hodi louva servisu Tomas Cabral ho ninia ekipa. Tinan ida antes, eis Premeiru Ministru ne’e mos propoin ba Guine-Bisau atu halo mos rekonsiliasaun nasional tuir experiensia Timor-Leste nian. Governo tempu ne’eba mos aprova tiha ona resolusaun governo 12 Agustu 2014 hodi fo apoio ba garante funsionamentu normal institusones estadu Guine-Bisau.

Liu hosi g7+ Timor-Leste hatudu bebeik ona ba komunidade internasional kona ba ninia suporta ba Guine-Bisau nudar ‘nasaun maun-alin’. Benefisiu ba Timor-Leste mak manan vizibilidade iha mundo internasional relasiona ho servisus seguransa no dezenvolvimentu pais post-konflitu sira. Guine Bisau mos haksolok ho tulun ne’ebe Timor-Leste fo tanba Guine-Bisau rasik hasoru hela problema ho la iha osan ba halao dezenvolvimentu. Ida ne’e tanba rai seluk mos iha sira nia frustrasaun ho situasaun Guine-Bisaun nian mak hatudu bebeik sinal instabilidade politika.

Iha 2014, Governo Timor-Leste fo apoio 6 Milioens hodi ajuda selu servisu publik balun ba fulan ida nian. Osan ne’e entrega hosi Xefe Ajensia Kooperasaun, Alberto Carlos. Governo Timor-Leste mos fo suporta 270,000 hodi apoio enkontru rekonsiliasaun nasional. Hamutuk ho apoio sira ne’e Governo Timor-Leste mos fo apoio asistensia teknika ba preparasaun eleisaun, hamutuk ho apoio hirak ne’e Governo mos tetu hela atu fo apoio ba reforma seguransa. Laos ida ne’e deit maibe Timor-Leste mos apoio ekipa Futebol Guine-Bisau nian hodi ba joga iha Taxa Nasaun Afrikanu nian iha 2014.

Iha sorin seluk, Lao Hamutuk projeta iha nia relatorio katak Timor-Leste nia debe sei sae to 1.2 Bilioens resin iha 2017 – 2021. Debe ne’ebe halo dala hat barak liu Estimasaun Rendementu Sustentavel. Iha tempu hanesan osan ne’ebe foti hosi Fundu Petroleu sempre a’as liu Estimasaun Rendementu Sustentavel. Governo halo justifikasaun katak osan ne’e uza hodi lori retornu sosial no ekonomia a’as, maibe osan debe hirak ne’e gasta ba deit projetu infraestrutura. Osan mak gasta ba Guine-Bisau mos osan ida mak sei la iha retornu ekonomiku no sei halo todan liutan ba despeza estadu nian.

 

LEAVE A REPLY

Please enter your comment!
Please enter your name here