Home Notisia KSTL: Governu Presiza Dignifika Saláriu Traballadór Hahu Ho Montante $200.00 Kada...

KSTL: Governu Presiza Dignifika Saláriu Traballadór Hahu Ho Montante $200.00 Kada Fulan

601
0

Reportajen David da Costa Gusmao

Prezidente Konfederasaun Sindikato Timor-Leste (KSTL), Almerio Vila Nova hateten governu presiza dignifika salariu ba traballadór sira ho montante $200.00 kada fulan, atu nune’e povu sira bele hadi’a sira nia moris.

 “Bazeia ba KSTL nia peskiza iha tinan 2014 ne’e ami halo analiza ba kustu moris nian, hatudu katak, ita nia Timor-Leste ne’e salariu ne’ebé dignifika ema nia moris ne’e, salariu ho montante $200,00 ne’e minimu. Ho Salariu $200 ne’e maka bele dignifika ema nia moris, se tun husi ida nee labele”, dehan nian ba jornalista sira iha Salaun SEFOPE Kaikoli, Segunda 11/10.

Nia haktuir estudu analiza kona-ba saláriu mínimu ne’e remata ona iha tinan kotuk, no haruka ona ninia ezbosu saláriu mínimu ba iha Ministériu Koordenadór Asuntu Ekonomia (MKAE).

“Ami espera katak, labele dada tempu kleur liu, tanba halo estudu no peskiza lubuk ida hodi konvida  sira mai hato’o hanoin ne’ebé maka iha hodi bele aselera aprova revizaun ba salariu minimu ne’e iha konsellu ministru”, katak nia.

Nia salienta tanba traballadór nia  saláriu mínimu ne’e tenke bazeia ba kustu moris nian, no mós bazeia ba inflasaun ne’ebé tinan-tinan iha mudansa.

“Ita falta ona revizaun ba saláriu mínimu ne’e ba dala haat, imajina osan $115.00 iha tinan 2012 to’o 2014, iha 2018 no 2020  ne’e ita husik ona ba dala haat. Imajina povu nia moris ne’e oinsa, ita tenke deside no ita fó valor ba povu nia moris, traballadór mós iha ninian família, kuandu nia moris ne’e la balansu ho ninian rendimentu ida ne’e, prejudika boot ba iha moris povu nian”, nia esplika.

Iha fatin hanesan Sekretáriu Estadu Formasaun Profisionál no Empregu (SEFOPE), Alarico de Rosario afirma progresu salariu ne’e han tempu, durante iha tempu naruk Konsellu Nasional do Traballu hamutuk ho Sekretariu do Arbitrazen halo estudu oioin ba rai vizinu sira, liliu haree ba salariu minimu.

“Ita bele halo debate ba salariu minimu tuir lei kada tinan, tenke halo revizaun ba salariu minimu, maibé buat hotu no desizaun ikus sei iha konsellu ministru, bainhira  halo serbisu tenke ba oin, maibé desijaun sei iha leten” hakotu nia.

Print Friendly, PDF & Email

LEAVE A REPLY

Please enter your comment!
Please enter your name here