Home Notisia Loron Mundial Radio, Tenke Dezenvolve Radio Komunidade Ho Plataforma Foun

Loron Mundial Radio, Tenke Dezenvolve Radio Komunidade Ho Plataforma Foun

494
0
Seminar Loron Mundial Radio (Foto: Zevonia Vieira)

Reportaje Ruben ‘Hamas’ & Mendes ‘Haksolok’

Konselho Imprensa [KI] selebra loron mundial radio nian. Iha loron radio mundial. Iha loron mundial radio, ho tema mundial “Promove Dialogu, Toleransia  no Dame”.

Prezidente Konselho Imprensa, Virgilio Guterres iha intervensaun durante talkshow direita iha Largo Licidere ba partisipante sira hateten konseitu radio nudar media komunikasaun ne’ebe sai instrument ne’ebe efetivu, no bele kontribui makaas tebes ba dezenvolvimentu rai laran no radio sai istoria uniku ne’ebe mak uluk luta nain sira uza hodi fahe informasaun.

“Uluk ita nia gerileru sira iha ai-laran, sira mos uza radio hodi komunika malu. Ha’u mós rona  radiu ida  intervista ho ex-gerileru Xanana ho Abilio Araujo bainhira mai iha Australia sira nain rua kontaktu liu husi radiu”, hateten Virgilio Guterres, 14/02.

Liga ho konseptu radio komunidade, Prezidente KI esplika katak, komunidade tenke hatene konseitu hosi radio komunidade iha Timor-Leste, tanba diferente oituan ho orijen radio komunidade sira nasaun seluk.

“Radio komunidade ne’e harii hosi komunidade, tanba radio komunidade ne’e atu hatoo komunidade nia lian, oinsa sira bele hatoo sira nia preokupasaun ba iha nasional no bele promove atividade komunidade nian. Programa ne’ebe fo sai iha radio komunidade tenke refleta ba komunidade nia atividade iha ne’eba. Tanba radio komunidade ne’e hosi komunidade, ba komunidade no hamutuk ho komunidade”, hateten Prezidente KI

Liga ho liberdade imprensa no espresaun, Virgilio Guterres hateten radio komunidade nia kontribuisaun ba demokrasia mak sosiadade ida livre, livre laos atu boo an deit, maibe livre atu hatoo nia opiniau no kritika.

Iha fatin hanesan, Prezidente Asosiasaun Radio Komunidade Timor-Leste [ARKTL], Prezado Ximenes iha intervensaun esplika katak ho ere digital radio hetan ameasa boot tanba ema barak liu asesu internet, no diferente oituan ho tinan 10  kotuk liuba.

Ho obstaklu refere, Prezidente ARKTL hateten katak radio, liu-liu radio komunidade tenke muda nia plataforma ne’ebe inovativu liu, atu bele kompete ho media internet sira.

“Internet sai fator determinante idea, tanba ohin loron ema asesu barak liu hosi internet. ARKT halo peskiza konaba kestaun media digital. Radio komunidade la dun iha kapasidade atu domina informasaun sira”, tenik Prezado.

Prezado hatutan katak ARKTL produs ona manual, hodi fo formasaun ba jornalista radio komunidade, konaba radio online, atu bele halo mudansa ba metodu ne’ebe mak durante ne’e sei uza.

Iha talkshow direta refere, Diretor Ceftec Timor-Leste, Luis Evaristo do Santos informa ba partisipante sira katak politika governu nian ba mandate 2019-2023, Sekretariu Estadu Komunikasaun Sosial [SEKOMS], iha komitmentu atu garante dezenvolvimentu radio komunidade iha teritoriu tomak ne’ebe mak eziste ona iha tinan naruk.

“Apoiu ne’ebe sei fo ba radio komunidade sira, sei kontinua apoiu to mandate remata. Iha planu atu aumenta radio komunidade tan iha area ne’ebe sedauk asesu informasau. Ita tenke halo asesmentu klean konaba efetividade radio komunidade nia forsa iha komunidade nia leet ne’e oinsa, tanba radio komunidade nia knaar ne’e importante atu servisu hamutuk ho komunidade sira. (Editor: Zevonia Vieira).

LEAVE A REPLY

Please enter your comment!
Please enter your name here