Home Notisia RENETIL Hasoru Malu Ho SekJen Fretilin

RENETIL Hasoru Malu Ho SekJen Fretilin

1289
0
RENETIL hasoru malu ho Sekretariu Jeral Fretilin, Dr. Mari Alkatiri. [Foto: Zevonia Vieira | 28.01.2020]

Reportazen Francisco JDA

“Uza lai posibilidade seluk ka alternativa seluk, laos eleisaun antesipada, forma governu ida ne’ebe bele fo resposta ba situasaun iha ita nia rain.  Eleisaun antesipada ne’e ultimo rekursu, bainhira laiha tan dalan seluk ona”, esplika Russuo

Resistência Nacional dos Estudantes de Timor-Leste (RENETIL) hasoru malu ho Sekretariu Jeral partidu Fretilin, Dr. Mari Alkatiri, hodi hatoo preokupasaun ba situasaun politika ne’ebe akontese agora dadauk.

Hafoin remata enkontru Sekretariu Jeral RENETIL, Juaquim “Russuo” Fonseca ba jornalista sira esplika katak, liu hosi enkontru ne’e atu hatoo hanoin ruma ne’ebe liga ho situasaun politika agora nian, hodi tetu didiak molok foti desizaun ba situasaun ne’ebe Timor-Leste hasoru, hodi nune’e labele fo implikasaun ba povu nian moris.

Preferensia saida mak RENETIL iha hodi hatoo ba Sekretariu Jeral Fretilin, relasiona ho situasaun agora? Karik dalan uniku mak eleisaun antesipada? hatan ba Neon Metin, Russuo esplika katak iha dalan seluk ne’ebe bele foti, molok hakat ba  iha eleisaun antesipada, tanba se akontese duni eleisaun antesipada mak sei uza osan ne’ebe ho kustu boot.

“Uza lai posibilidade seluk ka alternativa seluk, laos eleisaun antesipada, forma governu ida ne’ebe bele fo resposta ba situasaun iha ita nia rain.  Eleisaun antesipada ne’e ultimo rekursu, bainhira laiha tan dalan seluk ona”, esplika Russuo

Russuo hatutan sekarik atu halo eleisaun antesipada mos tenke hare didiak, tanba halo eleisaun bebeik ona, “lori fulan 5 ou 6 hanesan ne’e foin konklui nia prosesu, atu iha governu foun ida. Ami koalia ona ba media, problema ne’ebe povu sempre hasoru.  Problema ekonomia tinan rua ladun lao diak, tanba impase politik, depois foin dadauk udan, balun konsege kuda no balun la konsege kuda, balun falha no balun sei la hetan koilheta ne’ebe naton”, tenik Russuo.

Ba jornalista sira Sekretariu Jeral RENETIL mos hatoo katak, RENETIL mos informa ba Dr. Mari Alkatiri, hodi koalia no halo dialogu ho lider sira seluk, se iha diferensia ruma ne’ebe iha, koalia ba malu nune’e bele klarifika ba malu, bele iha entendimentu ba malu, “lider sira sempre husu ba ita joven sira atu hamutuk no halibur malu intende malu. iIta hakarak no ita sei rona sira no ita hakarak mos hare sira halo rasik”,  dehan Joaquim depois enkontru ho Dr. Mari iha Farol, 28/01.

Ativista RENETIL ne’e mos hateten katak sekarik ba eleisaun, iha dever ida atu hare kona ba ekonomia, atu iha provisoens para bele fo kbiit ba estadu responde, se karik povo iha nesesidade.

RENETIL mos tau ona iha ajenda, atu hasoru malu ho Prezidente da Republika, Primeiru Ministru, Taur Matan Ruak, no hein hela reposta, iha esforsu mos atu marka audensia ba Prezidente partidu CNRT Kayrala Xanana Gusmao  no mos sei hasoru malu ho Partidu Demokratiku.

 

LEAVE A REPLY

Please enter your comment!
Please enter your name here