Home Notisia Komite Popular Husu Ba Indonesia Hapara Violasaun Dereitus Umanus iha Papua Ocidental

Komite Popular Husu Ba Indonesia Hapara Violasaun Dereitus Umanus iha Papua Ocidental

285
0

Koordenador Komite Popular, Berta Antonieta lee deklarasaun konjunta, iha Jardin Borja da Costa, 29/08, deklarasaun ne’e kontein ezijensia ba governo Indonesia atu hapara violasaun dereitus umanus hasoru povo Papua Ocidental.

“Husu ba governo Indonesia atu hapara ona violsaun dereitus umanus iha Papua Ocidental, respeita povo Papua Ocidental nia aspirasaun, loke dalan ba observasaun Internasional no ajuda internasional ba sofrementu mak povo Papua Ocidental hasoru hela”, Berta deklara ho lian makaas, hamutuk ho reprezentante solidariedade internasional sira no ativista Timor-oan sira.

Deklarasaun ne’e halo tanba mosu iha reflesaun solidariedade nian no haree saida lao hela dadaun iha Indonesia no Papua Ocidental.

Iha dokumentu deklarasaun expresa katak, “Povo Papua Ocidental hasoru hela dadaun no hasoru bebeik injustisa iha sira nia rain no mos iha Indonesia nia rain. Ativista sira hetan kaer, tortura, kastigu, no hetan oho tanba hakarak expresa sira nia hanoin ba ukun rasik an liu hosi mekanizmu referendum. Povo sira mak inosente desloka hosi sira nia hela fatin ba fatin seluk hodi hases an hosi seguransa Indonesia sira. Pratika ne’ebe Indonesia halo iha Papua Ocidental hanesan ho saida mak nia halo ba povo Timor-Leste iha tinan 24 nia laran. Mantein opresaun no represaun iha Papua Ocidental  hodi husik povo moris kiak, hamlaha, no moris iha obscurantismu nia laran.”

Ezijensia mak hanesan mosu hosi lideransa estadu sira iha Pasifik. Sira husu atu ONU atu halo investigasaun ba violasaun dereitus umanus mak akontese iha Papua Ocidental.

“Lideransa nasaun sira iha Pasifik ho makaas dudu Indonesia atu fo tempu ba visita Altu Komisariu ONU nian ba Papua atu halo investigasaun ba relatoriu mak diskonfia akontese violasaun dereitus umanus, inklui tortura, oho la tuir lei, no violensia sistematiku hosi apparatus seguransa sira, hodi nune’e Komisariu ONU bele hasai relatoriu bazeia ba evidensia antes enkontru Forum Ilha Pasifik nian tinan oin,” sitasaun hosi komunike mak publika ona iha the Guardian.

To’o notisia ne’e publika, situasaun iha Papua Ocidental kontinua manas. Ativista Timor-oan sira diskonfia sei akontese saida hanesan Indonesia halo iha Timor-Leste durante Indonesia nia ukun.

 

LEAVE A REPLY

Please enter your comment!
Please enter your name here