Home Notisia SEFOPE & MSSI Halo Konsultasaun Programa Ema Ho Difisiensia, Ba Planu Asaun...

SEFOPE & MSSI Halo Konsultasaun Programa Ema Ho Difisiensia, Ba Planu Asaun Nasional

88
0
SEFOPE no MSSI halo konsultasaun Programa Ema Ho Difisiensia. [Foto: Francisco Jose de Almeida | 26.09.2019]

Sekretaria Estadu Formasaun Profisional no Empregu [SEFOPE] halo konsultasaun ho Ministeriu Solidariedade Sosial no Inkluzaun [MSSI] ba esbosu planu assaun nasional ema ho difisensia ba periodo 2020-2024, atu asegura programa no orsamentu ne’ebe inkluziva ba assuntu difisencia, no atinji objetivu desenvolvimentu sustentavel la husik ema ida ba kotuk. Iha loron Quinta Feira, 26/09/219 fatin salaun SEFOPE.

Liu husi konsultasaun ne’e Secretariu Estadu Profisional no Empregu, Julio da Silva hatete atu halo politika diak ida husi SEFOPE ho MSSI hodi tau programa di’ak ba ema ho difisensia sira

“Konsultasaun ida ne’e entre nivel ministeriais sira, liuliu SEFOPE no MSSI oinsa mak bele tau politika diak ida ba programa ema ho difisencia, durante ne’e mos sefope lao hela iha sentro senai Tibar no Becora iha mos programa balun ne’ebe oferece ba sidadaun sira ne’ebe ho difisencia”, hateten Julio.

Julio hatutan katak programa hirak ne’e sei kontinua tau prioridades ba ema ho difisensia, maibe presiza servisu hamutuk husi SEFOPE, MSSI, no Organizasaun ema ho difisencia nune’e bele kria politika nasional

“Iha 2020 ita sei kontinua nafatin programa prioridades ba ema ho difisencia maibe se diak organizasaun hirak ne’e iha fatin ida nune’e bele iha akordo ida nune’e bele kria politika ida no programa nasional nune’e governo bele preve osan hodi apoio programa sira ne’e”, tenik Julio

Maske nune’e Vise- Ministra Solidariadade Sosial no Inkluziva, Signi Verdial hatete planu assaun ba ema ho difisensia ne’e importante tebes, nune’e lori planu ne’e sai linha ba ministerial hotu

“Ita koalia asuntu ema ho difisencia, no liu husi planu asaun nasional ida ne’e nain ba dokumentu ida ne’e laos MSSI no Organizasaun ema ho difisencia deit maibe ministerio relevante hotu iha papel importante atu bele integra planu no programa ba asuntu ida ne’e, esplika Signi

Iha fatin hanesan Vice- Presidente ADTL, Gaspar Afonso afirma katak presiza tau valor ba sidadaun hotu-hotu liu liu ema ho difisencia atu bele hetan oportunidade hanesan iha treinamentu, kapasitasaun iha area oin-oin.

“Kriteria sira ne’ebe treinamentu nian sempre ofende ema ho difisencia tamba rekrutamentu sira sempre dehan presisa saude diak, ema kondisaun diak signifika katak iha separasaun ona, ema ho difisencia la iha oportunidade atu participa iha rekrutamentu sira tamba ne’e ema ne’ebe lidera Organizasaun ema ho Difisencia tenke koalia makas”, deklara Gaspar. * [ Francisco Jose de Almeida | Editor: Zevonia Vieira | Neon Metin | 26.09.2019

LEAVE A REPLY

Please enter your comment!
Please enter your name here