Home Meio Ambiente Jornalista Sira Simu Sertifikadu Hosi AJTL, Ba Formasaun Mudansa Klimatika

Jornalista Sira Simu Sertifikadu Hosi AJTL, Ba Formasaun Mudansa Klimatika

154
0
Jornalista hamutuk ho estrutura AJTL no Prezidente Konselho Imprensa iha formasaun konaba media and climate change. [Foto: Floriano Soares | 19.11.2019]

Reportazen Francisco JDA

“Hau hanoin AJTL laos para ho ida iha ne’e deit, maibe buka no esforsu an nafatin, para bele iha tan formasaun iha area seluk, to’o estrutura ida ne’e nia mandato remata, nune estrutura seluk mai bele hatutan tan”. David Hugo

Asosiasaun Jornalista Timor-Leste [AJTL], entrega sertifikadu ba jornalista hamutuk 38 ne’ebe maka partisipa iha treinaemntu konaba Media no Mudansa Klimatika, ne’ebe hetan apoiu finanseiru hosi UNESCO.

Iha loron simu sertifikadu, Prezidente Konselho Imprensa [KI], Virgilio da Silva Guterres ba jornalista sira hateten katak problema mudança klimatika ne’e problema ema barak nian no nudar problema global.

Presidente KI haforsa katak jornalista sira bele foti desizaun atu halo cobertura no foka barak liu iha mudança klimatika, liu-liu oinsa atu husu ba governu no instituisaun ne’ebe relevante, atu halo politika ida ne’ebe diak, ho nune mudança klimatika la fo impaktu ba comunidade.

Virgilio Guterres fo parabéns ba jornalista sira tanba konsege partisipa hosi loron dahuluk to remata, “hein katak saida mak fasilitador fo durante loron haat, bele kontribui ba hasae imi nia koinesimentu, hametin liu tan imi nia fiar katak servisu hanesan jornalista ne’e importante katak, ita esplora konnesementu sira ne’e ho biolijikamente hanesan ita han hahan sira ne’e”.

Iha fatin hanesan, Prezidente AJTL, David Hugo hatete nia parte fo agredese ba jornalista sira tamba maske lakon tempo iha loron haat nia laran, maibe hetan informasaun balun sai hanesan bukae

“Hau hanoin AJTL laos para ho ida iha ne’e deit, maibe buka no esforsu an nafatin, para bele iha tan formasaun iha area seluk, to’o estrutura ida ne’e nia mandato remata, nune estrutura seluk mai bele hatutan tan, hodi halao nafatin tuir nia misaun ne’ebé mak halo advokasia no formasaun ba jornalista sira”, tenik David

Prezidente AJTL fiar katak durante loron haat bele hetan ona buat ruma, hodi utuliza ba iha servisu fatin, hodi fo nafatin informasaun diak ba publiku sira kona ba impaktu sira konaba mudansa klimatika.

Total partisipantes ne’ebe partisipa formasaun hamutuk 38, jornalista mai hosi instituisaun media hamutuk 34, hosi Universidade Timor Lorosa’e nain rua no UNITAL nain rua. formasaun ne’e halao iha Salaun Yayasan HAK, Farol Dili, hosi 13-16 Novembru 2019.

LEAVE A REPLY

Please enter your comment!
Please enter your name here