Reportazen Santina Lucia da Costa
Prinsipiu fundamental hosi ukun rasik an mak atu liberta povu hosi ukun kolonialismu, tama tinan 20 resin povu hetan nia liberdade hosi okupasaun illegal. Mosu perguntas hosi povu sira tanba sa to’o ohin loron sedauk bele liberta povu hosi mukit?
Perguntas ne’e mai hosi Xefe Suku Ura-hou, Alberto Soares bainhira ekipa media Neon Metin halo visita ba Suku Ura-hou, sub administrativu Hatulia, Municipu Ermera. Xefe Suku hateten komunidade iha Ura-hou sei kontinua moris mukit tanba dezenvolvimentu sedauk to’o iha rai ne’e.
Nesesidade importante ida mak eletrisidade, tinan 20 resin maibe povu kontinua moris iha nakukun nia laran, komunidade labele asesu eletrisidade, labele asesu informasaun liu hosi televisaun tanba ahi laiha. Se los mak bele hatan ba iha ida ne’e? maske Konstituisaun ezije atu ema hotu moris dignu.
Komunidade rasik esforsu an hodi hola solar panel ne’ebe xineza sira faan, hodi bele fo naroman netik ba sira nia uma laram iha tempu kalan, maske nia forsa la dun makaas, maibe komunidade pasensia hola netik solar panel, tanba laiha dalan seluk.
Xefe Suku hamutuk komunidade balun ne’ebe Neon metin hasoru iha Ura-hou kontinua preokupa ho sira nia situasuan, bainhira sira rona no lee iha sosial media konaba proposata Orsamentu Jeral Estadu 2020 ne’ebe mak la pasa iha Parlamentu Nasional, karik sira sei kontinua moris iha nakukun nia laran? Sira espera ida ne’e la akontese.
Suku Ura-hou fatin istoriku ida ne’ebe karik ulun boot sira haluha? Fatin subar Falintil sira iha tempu funu, hanesan Somoxo, Koni Santana, Xanana Gusmão, Dudu, no Falintil sira seluk, ne’ebe uluk komunidade fo han sira, subar sira no proteje sira hosi military Indonesia, maibe ohin loron fatin ne’e sai fuik.
Xefe Suku rasik konfesa katak eis Falintil sira rasik to’o ohin loron sedauk mai vizita fatin ne’e.
