Home Uncategorized Estudante 18 Partisipa iha Programa Interkambiu JENESYS

Estudante 18 Partisipa iha Programa Interkambiu JENESYS

300
0
Estudante 18 Partisipa iha Interkambiu JENESYSI 2019, iha Japaun.

Reportazen Adroaldo “Seratukau

Durante loron 9 (25 Febreiru – 3 Marsu 2020) estudante Timor oan nain 18 halo interkambiu JENESYS (Japan East Asia Network of Exchange for Students and Youths’ 2019) iha Japaun, iha loron ikus sira mós halo aprezentasaun ba iha komisaun organizadora konabá saída mak durante sira hetan no planu asaun saida mak sira sei halo depois de fila. 

Enseramentu Program Jenesys 2019 ho tema “Komunikasaun Lian Japones no interkambiu kultura Japones nian” halo’o iha Office Hamamatsucho, Shibakoen, Minato-ku, Tokyo Jepaun ne’ebé partisipa hosi Eis Embaixador Jepaun ba Timor-Leste Sr. Iwao Kitahara, Counselor Emabaxada Timor-Leste iha Tokyo Sr. Nuno A. M. M. Alves nomós komisaun Organizadora Japan Tourist Bureau (JTB).

Ministru Negósiu Estrajeiru Jepaun lansa ona ‘Programa lasu amizade’ ne’ebé atu promove interkambiu ema ba ema entre Jepaun ho nasaun oi-oin hosi Ázia-Pasífiku, Amérika Norte, Europa, Amérika Latina no Karibe, atu insentiva entendimentu Jepaun nia ekonomia, istória, kultura ne’ebé oi-oin, polítika no relasaun diplomátika entre partisipante sira.

Objetivu hosi programa ida ne’e mak promove konfiansa no entendimentu mútua entre povu Japones no rejiaun sira iha Ázia-Pasífiku no konstroi baze futuru ida amizade ho koperasaun. Objetivu ida mos mak atu promove deziminasaun proativu pontu atraente Jepaun nian liu hosi métodu disponíveis hosi publikasaun no komunikasaun. No mos atu enkoraja hodi komprende Jepaun nia economia, sosiedade, istória, kultura oi-oin, polítika no relasaun diplomátika sira.

Eis Embaixador Japan ba Timor-Leste Sr. Iwao Kitahara expresa nia hanoin hodi enkoraja jerasaun foun sira atu forte liutan.

Hosi aprezentasaun ohin ha’u hatene ona, partisipante sira hotu ne’ebé iha ne’e, hetan buat barak no esperiénsia foun ne’ebé foin hatene iha programa ida ne’e. Timor-Leste, los duni imi hadomi tebes, hosi tinan ida ne’e desde loron 20 fulan maiu tinan 2002, hosi restaurasaun independénsia halo ona tinan 18. Hanesan nasaun dahuluk ne’ebé hetan independénsia iha sékulu 21 no hanesan nasaun foun iha Kontinente Ázia”, Iwao hatete.

Nia mos hatutan dehan, “Povu hotu iha Timor-Leste, agora da-dauk iha konsentrasaun ba harii estadu Timor-Leste ida ne’e. Hanesan lideransa ohin loron, imi iha Prezidente Sr. Lu’olo, Sr. Taur Matan Ruak, Sr. Xanana Gusmão nomos Sr. Ramos Horta, hanesan imi nia lideransa iha Timor-Leste. Maibé lideransa hirak ne’e kleur no sei katuas iha loron ida, tanba ne’e ba oin hanesan lideransa foun Timor-Leste nian, mak ita boot sira nia jerasaun ne’ebé sei joven hela.  Ha’u hakara hato’o lia-fuan ida ho lian Tetun ‘Joven sira forte, nasaun mós forte’.”

Nia husu atu estudante sira iha vontade hanesan jerasaun foun tuir mai ne’ebé sei harii nasaun. Hatete mos katak estudante sira sorte tebes hodi tuir programa ida ne’e, husu ho favor atu exepriénsia no matéria sira ne’ebé ita boot sira hetan, bele aplika ka benefísia ida ne’e iha imi nia nasaun no ba oin tenki dezafia imi nian aan.

Komisaun Organizadora JTB Sr. Jungi Mise esplika kona ba programa JENESYS ne’ebe promove interkambiu kultural no mos komunikasaun. Nia expresa mos nia laran haksolok ho Action Plan ne’ebe estudante sira halo ona.

“Maske tempu ba program ne’e badak de’it maibé action plan ne’ebé ita boot sira dezenu, di’ak tebes. Hosi informasaun ne’ebé publika iha Facebook no aprezentasaun action plan ida ne’ebé prepara no no hanoin, ami bele komprende katak bele hakle’an liu ita boot sira konabá Japaun”, Jungi esplika. 

Jungi mos dehan katak, “Experiénsia ne’ebé folin tebes liu hosi interkambiu no komunikasaun, ho fiar katak bele hetan no hariku moris ba future. Lakleur tan programa ne’e sei hotu maibé programa Jenesys seidauk remata, maske ita boot sira fila ba ita boot sira nia nasaun.”

Nia espera katak partisipante hotu, fahe hikas esperiensia no saída de’it mak aprende iha ne’e, iha ni-nia ambiente ne’ebé nia hela ba, tuir planu asaun ida-idak nian. Husu atu kontinua ka tulun nafatin relasaun Timor-Leste ho Jepaun nian. Ikus reza atu nasaun rua ne’e bele forte nafatin nomos ba partisipante sira hotu.

Partispante JENESYS, Joaninha Alves Guterres Perreira, expresa nia haksolok ho visita kultural ida ne’e no admira ho japones sira nia hahalok respeitu no sira nia motivasaun ba jerasaun foun sira.

“Ha’u la espera atu tuir programa ida ne’e, bainhira ha’u rona katak ha’u nia naran faz parte ba delegadu ida hodi mai partisipa iha programa Jenesys iha Jepaun, ha’u sente kontenti tebes, no ida ne’e hanesan mehi ida, tanba uluk sei ki’ik ha’u excited los konabá rai ida Jepaun ne’e, tanba rai ida Jepaun ne’e nakonu ho ema matenek, ema respeitozu, ema hahalok di’ak de’it no ema ne’ebé kumpri oras, kumpri regra no fatin moos tebes”, Joaninha haktuir.

Joaninha mos hatete katak, “saída mak sira halo ne’e motiva tebes ha’u atu fila fali ba TIimor, bele aplika fila fali. Program ida ne’e la’os hanorin ha’u oinsá atu mai rai Jepaun, oinsá mai haree rai Jepaun, maibé hanorin ha’u ho kolega sira buat foun ne’ebé motiva tebes. Saída mak ha’u aprende iha ne’e sura labele, tanba sira nia nasaun ne’ebé mudansa teb-tebes iha era globalizasaun.”

Hanesan Joaninha, partisipante JENESYS ida seluk, Adroaldo de Almeida expresa nia haksolok ba saida mak nia aprende ona iha Japaun no hakarak fahe ida ne’e ho ninia komunidade.

“Hau sente kontente tebes tanba bele hetan opotunidade hodi mai tuir interkambiu komunikasaun lian Japones no kultura Jepaun nian. Iha interkambiu ida ne’e hau hetan esperiensia foun, aumetan tan ha’u nia koñesimentu no hetan oportunidade hodi dezenvolve ha’u nia aan. Experiensia foun ne’ebé ha’u hetan sai hanesan referensia atu nune’e bele kontribui ba ha’u nia komunidade no nasaun, Adroaldo haktuir.

Adroaldo mos dehan katak, nia senti kontenti tanba bele iha esperiénsia hamutuk ho ema matenek no nasaun ne’ebé dezenvolvidu hanesan Jepaun, nia sente sorti tebes. Nia aprende lisaun pozitivu barak iha ami nia interkambiu ida ne’e alein de materia no vizita importante sira, buat seluk ne’ebé relasiona ho moris lor-loron nian hanesan Pontual, onestidade, servisu maka’as, disiplina ne’ebé aas tabes no buat barak seluk.

Program interkambiu Jenesys tinan 2019 ida ne’e partisipa hosi estudante 18 feto 11 no mane 7, ne’ebé estuda lian Japones nian iha fatin 5 iha Díli hanesan Sentru Formasaun Sta. Rafaela Bebonuc, estudante na’in 3, Universidade Nacional Timor Lorosa’e (UNTL), estudante na’in 3, Youth Men Christian Association Timor-LEste (YMCA-TL) Tasi Tolu, estudante na’in 4, Program Development for the future (PDF) Tasi Tolu, estudante na’in 4 no Centro Quesadip Ruak (CQR), Colmera, estudante 4.

Program ida hala’o iha Jepaun durante loron 9 hahú hosi loron 25 fulan Fevereiru to’o loron 3 fulan Marsu.

LEAVE A REPLY

Please enter your comment!
Please enter your name here