Home Notisia PM Fiar Proposta FP Sei Aprova Iha PN, Fretilin Garante, Adriano: Tenke...

PM Fiar Proposta FP Sei Aprova Iha PN, Fretilin Garante, Adriano: Tenke Aprova

1416
0
Plenaria parlamentu nasional. [Foto: copyright media gov | 17.01.2020]

Reportazen Zevonia Vieira

VIII Governu Konstituisional sei aprezenta proposta ba levantamentu orsamentu hosi Fundu Petroliferu [FP] atu finansia rejime duodésimu no uza ba situasaun emergencia.

Situasaun emerjensia ne’ebé mak Nasaun hasoru hela ho surtu virus Corona iha mundu tomak no inundasaun boot ne’ebé akontese iha Dili semana kotuk, hamihis dadauk osan iha Tezoru Estadu nian ne’ebé durante ne’e governu uza hodi finansia orsamentu duodesimu.

Tan Lei regula katak osan iha Kofre Estadu nian labele menus husi $ 200 milloins, ohin Konsellu Ministrus governu konstitusional VIII aprova Proposta Lei ne’ebé sei autoriza levantamentu extraordinaria husi Fundu Petroliferu. Primeiru Ministru Taur Matan Ruak ho ninia governu sei lori proposta lei ne’e ba Parlamentu Nasional atu approve hodi autoriza governu foti osan husi Fundu Petrolíferu.

Proposta Lei ida ne’e husu atu parlamentu nasional autoriza levantamentu osan ho montante $250 milloins.

Iha Sabadu, loron 14/03 hafoin hato’o intervensaun iha konferensia nasional IV FRETILIN nian iha salaun Parokial, Katedral Dili, Primeiru Ministru, Taur Matan Ruak ba Neon Metin hatete katak nia fiar Parlamentu sei aprova pedidu levantamentu ne’ebé ninia governu sei aprezenta ba parlamentu nasional.

Hau fiar katak sei aprova, mais se la aprova ita nia nasaun paradu, osan laiha. Hau espera katak nai deputadu sira bele komprende situasuan ne’e no fo apoiu”, hateten Taur Matan Ruak.

Iha fatin hanesan Neon Metin husu ba Sekretariu Jeral partidu FRETILIN, Dr. Mari Alkatiri oinsa bankada FRETILIN nia pozisaun, karik garante sei aprova iha Parlamentu?

Dr. Mari hatan katak bankada FRETILIN garante sei aprova governu nia pedidu atu levanta osan husi fundu petroliferu iha parlamentu, hodi hatan ba nesesidade povu nian.

Hanoin hanesan mos mai hosi Deputadu Partidu Demokratiku, Adriano Nascimento, ba Neon Metin Adriano hateten katak nia hanoin iha situasaun hanesan agora tenke foti osan hosi fundu petroliferu, hodi nune’e makina Estadu labele paradu.

“AMP uluk ne’e hanoin dook liu, lori tan governu FRETILIN no PD ba Tribunal maske [tribunal] hateten ona katak ne’e Konstituisional no legal hodi foti osan, tanba ida ne’e ba Estadu. Hau hanoin tenke foti osan no makina governu labele paradu”, hateten Adriano iha salaun Katedral.

Adriano mos deklara katak lolos ne’e AMP  halo salah, uluk FRETILIN ho PD nia tempu Lei ne’e hateten kuandu situasaun emergencia, governu la presiza husu maibe haruka deit karta hodi informa parlamentu. iIha tempu ne’ebe FRETILIN ho PD nia governu haruka deit karta, depois governu foti ona, ne’e esplika iha Lei, maibe AMP muda tiha lei ne’e no agora tenki lori duni ba husu autorizasaun husi parlamentu.

“Dalan uniku tenke foti, agora se mak la aprova osan ne’e, nia tenke responsabiliza ba povu tanba agora dadauk povu enfrenta hela problema natureza no responde nesesidade povu nian”, Adriano hatete.

Segunda semana ne’e loron 16/03, Ministra Finansas interina deklara iha parlamentu nasional katak governu sei lori pedidu ba parlamentu nasional iha tempu badak nia laran, maibé lahatene sei lori ba sa loron.

Chefe Bankada FRETILIN, deputadu Aniceto Guterres Lopes deklara durante plenaria iha parlamentu nasional loron 16/03 katak bankada FRETILIN sei fo apoiu wainhira governu lori pedidu ba parlamentu nasional.

LEAVE A REPLY

Please enter your comment!
Please enter your name here