Reportazen Zevonia Vieira
Dezastre naturais ne’ebe foin lalais akontese iha Dili laran, rezulta komunidade barak iha area leste nian afetadu.
Prezidente da Republika Dr. Francisco Guterres Lu Olo hatoo mesajen katak iha loron 13 Marsu liu ba udan boot no bee sae, ih mota Maloa Becussi, Becora no Hera no fo konsekuensia aat no boot tebes ba komunidade.
Tuir relatoriu ikus liu hosi servisu Protesaun Sivil ho data 19 Marsu, bee mota lori joven ida to’o nia mate, ema 24.324 mak afetadu hosi bee sae iha Dili.
Governu presiza $20 Milloins atu hadiak infraestrutura sira ne’ebe bee sobu ka estraga. Ho nune’e Prezidente da Republika husu ba Parlamentu atu aprova lalais proposta Lei alterasaun ba Lei Orsamentu no Jestaun Finanseira, atu governu bele foti osan lalais hodi responde ba povu nia susar no pais tomak nian.
“Ita nia ema nia saude tama iha risku, afetadu sira presiza ita hotu nia apoiu. Presiza hahan, bee moos, roupa, aimoruk, material ba harii ka hadiak uma. Serisu Protesaun Sivil mak koordena fahe ajuda ba afetadu sira. Ita presiza hamoos no hadiak lalais Dili”, hateten Lu Olo, 19/03 iha Palacio Prezidensia.
Prezidente hatete katak ita tenke hasoru ameasa no dezaifu sira ne’e ho kalma no serenidade, lalika paniku. Estadu iha Dever atu proteje maibe sidadaun iha responsabilidade atu kolabora no tenke serbisu hamutuk.
“Governu komprometidu atu resolve problema, nune’e hau apela ba ema hotu, liu-liu ba instituisaun publika sira, atu apoia governu hodi bele hatan no efikasia ba situasaun atual. Husu mos ba lider no partidu sira politiku sira, atu hamutuk haree ba povu nia nesesidade iha tempu susar ida ne’e”, deklara Prezidente da Republika.
Xefe Estadu ne’e hatoo hakoak boot no solidariedade ba maluk afetadu sira iha tempu halerik ba susar oioin ne’ebe hatpda sira ni moris, “hau nia hakoak boot ba familia ne’ebe lakon joven ida hosi uma laran”.
Prezidente husu ba ema hotu fo liman ba malu, serbisu hamutuk iha tempu susar ida ne’e. husu ba entidade relevante sira atu haree oinsa hadiak sidade Dili ho Planu Urbanizasaun ne’ebe fasilita populasaun nia moris diak iha tempu ne’ebe deit.
“Hau ni rekonnesementu ba serbisu protesaun sivil, igreja Katolika no konfisaun relijioza sira seluk, ajensia nasional no internasional sira, sidadaun estranjeiru, ba Xefe Suku sira no komunidade tomak, tanba sira nia atuasaun lalais iha terrenu, hodi fo asistensia ba familia sir ne’ebe afetadu hosi udan boot no bee sae”, hateten Lu Olo
Prezidente mos apresia no agredese Instituisaun FFDTL no PNTL sira nia serbisu tulun halo limpeza iha sidade laran. Hau apresia no agradese mos ba emprezas no setor privadu ne’ebe tulun populasaun ho sira nia ekipamentu no transporte pezadu, hodi ajuda halo limpeza jeral. Ba joven sira iha bairru ne’ebe fo sira nia solidariedade ba maluk sira ne’ebe husu sira nia ajuda no protesaun.
Serbisu Metereolojiku, tanba fo informasaun loloos konaba previzaun ba tempu, ho nune’e Prezidente da Republika fo agradese mos tanba halo ona serbisu ho diak.
