Reportajen Joselina dos Santos
Komunidade Aldeia Da’e-Mena ho Aldeia Cairedo Suku Abo, Postu-Administrativu Quelicai, Munisipiu Baucau hamutuk uma kain 120 ohin simu ona Sesta Bázika husi parte Sentru Lojístiku Nasionál (CLN).
Komunidade Madalena da Silva Soares hateten nia sente kontente tebes ba sasán Sesta Bázika tanba iha situasaun COVID-19 nia laran ne’e difisil tebes komunidade sira sai buka moris ladi’ak, tanba durante sira kumpre regulamentu Estadu Emerjénsia no Serka Sanitaria no la iha movimentu maibé ohin loron sira bele simu sasán Sesta Bázika, hodi bele sustenta sira moris iha loron hirak nia laran.
“Ami agradese no obrigadu ba governu tanba iha situasaun difisil hanesan ne’e bele fahe ona ai-han ba ami komunidade sira iha Suku Abo, maski sasán Sesta Bázika ne’e tarde uitoan maibé bele to’o iha ami nia munisípiu, hodi distribui ba ami ne’e agradese ona,dehan Madalena Ba Neon Metin via Telefone 03/06.
Iha fatin hanesan komunidade Luis Dos Santos haktuir relasiona ba sasán Sesta bázika ne’ebé governu oferese ba komunidade suku Abo, nia sente kontente tebes tanba iha situasaun COVID-19, susar ba ema hotu hodi buka osan responde ba nesesidade uma laran, tanba loron-loron iha uma de’it la halo buat ida oinsá mak bele hetan osan.
“Hanesan komunidade iha suku ida ne’e, ha’u agradese ba parte governu tanba bele hanoin ba povu nia terus no susar ne’ebé enfrenta hela iha pandemia COVID-19, maski iha area rural maibé governu konsege esforsu to’o iha ami nia fatin, atu bele aguenta netik ami nia nesesidade iha tempu badak nia laran,” dehan Luis.
Luis husu ba governu hodi nafatin fó liman ba malu hamutuk ho povu Timor-Leste, hodi bele hasoru funu bo’ot COVID-19, atu bele haree ba povu nia moris ,hodi hasai povu husi moras COVID-19 no hasai povu husi ki’ak no mukit.
Iha parte seluk Xefe Suku Abo Fidelio S. dos Santos informa ba Neon Metin katak sasán Sesta Bázika ne’e to’o iha Suku Abo, Postu-Administrativu Quelicai, Munisipiu Baucau iha loron 16 – 17 Maiu.
“Nu’udar autoridade lokal ha’u agradese ba governu tanba maski iha situasaun pandemia COVID-19 nia laran maibé governu nafatin esforsu no kumpre duni hodi fahe Sesta Basika ba ha’u nia komunidade sira iha Suku Abo,” dehan Xefe Suku.
Xefe Suku haktuir komunidade sira sente kontente tebes ba Sesta Bázika ne’ebé governu oferese, no sasán hirak ne’e governu oferese pakote rua mak hanesan produtu lokál no produtu esportasaun no importasaun, pakote ne’e hamutuk 18 maibé item tolu mak laiha, entaun governu aloka tiha ba foos, kada ema foos saka ida no nesesidade báziku sira seluk
