Reportajen David da Costa Gusmao
Ministeriu Saude (MS) liu husi Sala Situasaun Centru Integradu Jestaun Krize (SS-CIJK) ohin relata rezultadu sekuensiasaun genomica amostra 20 husi kazu pozitivu iha Munisípiu Ermera ne’ebé haruka ba Australia, hatudu katak ema nain 12, iha liñajen B.1.617.2 (Delta variant) ne’ebé preokupante, ka variant of concern.
Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araujo hateten katak rezultadu sekuensiasaun genomica amostra 20 husi kazu pozitivu iha Munisipiu Ermera, ne’ebé Laboratóriu Nasionál Saude haruka iha loron 29 Jullu 2021 ba Peter’s Doherti Institute iha Melbourne, Australia, ho pedidu atu halo análize urjente, hetan ona resposta preliminár, iha loron 7 Agostu 2021.
“Rezultadu sekuensiasaun genomika hadutu katak amostra husi ema nian 12, iha liñajen B.1.617.2 (Delta variant) ne’ebé preokupante, ka variant of concern,” Dr. Rui esplika liu hosi komunikadu imprensa ne’ebé Neon Metin asesu iha loron, Domingu 08/08.
Nia haktuir, husi sira nian 12 ne’e, balun hala’o izolamentu terapéutiku iha fasilidade ne’ebe governu prepara, balun halo izolamentu terapéutiku domisíliariu.
Nia dehan rezultadu hirak ne’e hatudu katak variante preokupante Delta nakda’et ona iha komunidade Ermera nia le’et.
Entretantu dados jeral ba COVID-19 ohin loron 8 Agostu kazu foun 54, kazu rekuperadu 19, kazu ativu baixa 1335, kazu obitu ohin nain ida, no total obitu hamutuk 27 no total kazu konfirmadu kumulativu sura husi Marsu 21 2020 to’o mai ohin loron 8 Agostu hamutuk 11.475.
