Reportajen David da Costa Gusmao
Ministériu Saude (MS) liu husi Sala Situasaun Centru Integradu Jestaun Krize (SS-CIJK) ohin rejista tan timoroan nain ida mate iha izolamentu Vera Cruz, matebian ne’e mate ho idade 67, hela iha Bebonuk, Dili, diagnostikadu ho COVID-19 (Cycle Threshold: N2 gene 20,3, E gene 18,2).
Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Dr. Rui Maria de Araujo hateten ohin loron 8 Agostu tinan ne’e, Ministériu Saude (MS) rejista tan ona kazu obitu ka mate ema na’in ida, ho sexu mane, diagnóstiku ho Covid-19 (Cycle Threshold: N2 gene 20,2, E gene 18,2).
“Metebian iha istoriain sufisiénsia renal faze terminal, hala’o tratamentu regular ho hemodialize. Iha loron 7 Agostu lorokraik aprezenta-an iha emerjensia HNGV, ho sindroma insufisiénsia respiratória aguda (SIRA), ka susar/difisil atu dada-iis no iha loron ne’e kedas transfere ba halo tratamentu iha Vera Cruz, tuir protokolu tratamentu COVID-19,” Dr. Rui esplika liu hosi komunikadu imprensa ne’ebé Neon Metin asesu iha loron, Domingu 08/08.
Nia esplika, hafoin oras balun pasiente la mellora, no iis kotu horikalan iha oras 21:45, tanba respiratory failure no multiple organ failure. Familia koordena ho ekipa saude atu hala’o funeral tuir protokolu ne’ebé adopta iha Timor-Leste.
Entretantu dados jeral ba COVID-19 ohin loron 8 Agostu tinan ne’e, kazu foun 54, kazu rekuperadu 19, kazu ativu baixa 1335, kazu obitu ohin nain 1 no total obitu hamutuk 27 no total kazu konfirmadu kumulativu sura husi Marsu 21 2020 to’o mai ohin loron hamutuk 11.475.
