Home Analisa Sigaru Illisitu, Promosaun, Patrosinu no Publikasaun ba Tabaku Durante EE 2021

Sigaru Illisitu, Promosaun, Patrosinu no Publikasaun ba Tabaku Durante EE 2021

261
0
ilustrasaun tabaco. [Foto: copyright google | 04.06.2021]

Survey husi ANCT-TL

  1. Introdusaun

Tabaku oho ema tokon 8 kada tinan iha mundu. Maske nu’une industria tabaku ho nia aliandu sira la-responsabiliza ba sira nia produtu. Sira kontinua produs, gasta osan hodi promove sira nia produtu hodi dada fumante foun no mantein kliente atual.

Timor-Leste ratifika ona konvensaun internasional ba kontrolu tabaku (FCTC) iha Dezembru 2004. Artigu 5.3 husi konvensaun refere oferese solusaun Guvernu hodi dezenvolve pulítika prevensaun ba  interferensia husi kompanhia tabaku nian. Maske nu’une estadu seidauk  implementa konvensaun refere durante tinan 12 nia laran depois ratifika. Ne’ebé kauza, atividades merkadoria no habelar merkadu foun ba produtu tabaku sa’e a’as no namkari iha terioriu hotu derante tinan naruk nia laran.

Iha tinan 2016 Guvernu Timor-Leste ho susesu aprova pulítika  kontrolu tabaku nian. Lei nú; 14/2016 hakerek diak-liu no konstetualiza kondisaun kontrolu tabaku nian, ne’ebé adapta solusaun sira husi konvensaun kontrolu tabaku nian. Artigu 19, 20, 21 proibuidu kualker atividade promosaun, publisidade no patrosinu ba no husi entidade komersiates. Artigu 12 konaba Rotulagen no Artigu 13 konaba aviza saude ka aviza sanitaria. Maske nu’une ANCT nota katak, durante fulan Tolu implementador la-halo inspesaun regularmente no transaksaun ba produtu tabaku sa’e a’as.

Survey ida ne’e dezenvolve hodi halibur evidensia ba atividade entidades komersiates sira nian iha estadu emergensia nia laran ka durante pandemia. Survey ne’e dezenvolve hodi hare liu kona-ba Marketing activities ka deskobre prevalensia sigaru illisitu husi entidades relevantes  sira mensiona iha leten.

  • Objetivu

Objetivu husi monitorizasaun ne’e atu identifika estatutu implementasaun dekretu lei tabaku no. 14/2016 artigu 12 (rotulazen), 13 (Advertensia Sanitaria), 14 (Mensajen Proibida), 19 (Proibisaun sira),  artigu 20 (Asaun publisitariu sira), artigu 21 (Patrosiniu) durante Estadu Emergensia tinan 2021.

  • Metodologia

Konseptu husi survey ne’e, ANCT uza metódu observasaun (Observational study) no foti fotografia hodi koleta dadus sira. Molok tun peskiza ANCT fó treinamentu no prátika durante loron rua ba observador. Observador sira hetan introdusaun jeral liga ho artigu 12, 13, 14, 19, 20,21 no 22 husi Dekretu lei tabaku no hetan treinamentu kona-ba téknika hodi koleta dadus iha fatin peskiza. Instrumentu ne’ebé sei distribui ba observador sira uza durante treinamentu mak formatu observasaun, Lapizeira no kopia Dekretu lei tabaku inklui camera.

Uainhira observador halao peskiza, ANCT monitoriza observador kada loron liu-husi telefone no enkontru hodi identifika progresu, dezafius no fo solusaun.

Iha survey ne’e Ami mós rekolla sigaru kulit mamuk liu-husi vizita fatin públiku sira hanesan merkadu, fatin lixu, iha loja oin, restaurante oin no seluk tan. Objetivu husi rekolla sigaru kulit mamuk ne’e mak atu identifika ratio husi sigaru ilegal ne’ebé ezisti iha Timor-Leste. Total sigaru kulit mamuk ne’ebé rekolla iha survey ne’e, hamutuk 1000.

Tempu peskiza ne’e hahú iha fulan Marsu 2021 no remata iha Maiu 2021. Observador  halo observasaun durante semana rua ka bele liu uainhira nesesita.

Variavel iha peskiza ne’e mak, Rotulazen, Advertensia Sanitaria, Mensajen Proibida Bandu Publisitariu, Promosaun no Patrosiniu.

Definisaun operasional ba rotulazen no advertência sanitária mak; Mensagen sensibilizasaun no edukasaun saúde ne’ebé diriji ba fumantes no ema hotu  kona-ba moras ne’ebé sei kauza husi uza tabaku.

Definisaun operasional ba Bandu Publisitariu, Promosaun no Patrosiniu hanesan aksaun sira ne’ebé halao hodi komersializa produtu tabaku no influensia ema-nia poder de compra. Konforme artigu 19, 20, 21 no 22 defini, katak bandu atu kualkér tipu negosiu sira hetan bandu atu la halo promosaun ba produtu tabaku.

Survey ne’e sei halao iha Munisipiu Dili Postu Administrativu Nain Feto, Dom Aleixu no Vera Cruz ho total amostra hamutuk 150.

Tékniku ba determina amostra iha survey ne’e, utiliza teknika amostra agrupamentu ka cluster sampling katak total husi populasaun ka area ne’ebé peskizador forma tuir cluster bazeia ba selesaun ba individu no areas ne’ebé reprezenta populasaun ka amostra husi tárjetu.

Material no prosedimentu ba peskiza ne’e mak kestionariu, lapizeira, camera android no Dekretu lei tabaku ne’ebé ANCT prodúz no distribui ba observador sira hafoin kompleta treinamentu ba peskiza nian.

Dadus sira sei ba rekolla uanhira observador remata peskiza no sei halo evaluasaun no sei verifika fila-fali dadus sira ba iha fatin sira bazeia ba kestionariu. Hafoin remata kordenadora programa sei entry dadus sira ba iha formatu ne’ebé utiliza Microsoft excel, cleaning data no ikus análiza dadus. Faze ikus liu sei dezenvolve sai relatoriu final ida ne’ebé sei aprezenta ba autoriedade relevante.

Rezultadu final ho dadus sira hotu sei arkiva iha fatin dadus ANCT nian.

3. Resultadu survey

3.1 Publisidade, Promosaun no Patrosinu

Husi sample ne’ebé  observa, ANCT deskobre atividade promosaun brand tabaku ba tipu sigaru Tolu mak hanesan Marloboro, L.A ho D&B. Produtu tabaku D&B  dadus hatudu seidauk fa’an iha munisipiu Dili. Maibé tuir resultadu observasaun  deskobre iha kiosk Ha’at husi amostra 150, mak taka Posters sigaru ho tipu ida ne’e. Ne’e inklui Kareta Cool Box Ida ne’ebé tau poster Bo’ot liu iha lolon no promove ho liafuan “Gostu tebes”. Liafuan ne’e mak meius  

promosaun ne’ebé industria tabaku sira bai-bain hala’o hodi influensia, katak sira nia produtu ladun perigu, maske realidade hatudu sira nia produtu mak assasinadu bo’ot no oho ema tokon 8 kada tinan iha mundu. Promosaun Brand seluk ANCT deskobre iha objetu sira hanesan  Iskeru, Bola no Billboard. Promosaun brand sira ne’e  hetan iha Loja no Kioske 15 iha. Loja bo’ot ida iha Dili laran mak halo promosaun brand liu-husi Iskeru ho marka Marlboro. Nu’une mós Billboard 5 (Tuan ona) ho marka L.A sei ta’u subar iha Loja sira nia oin. Nota Billboard ho Marka L.A ho mensajen “Enjoy Aja” ne’ebé ho intensaun hanesan mensiona ona iha leten. Ami nota Billoard hirak,  ne’e kleur ona ta’u iha ne’eba, maibé autoriedade sira  seidauk hasai, Billboard Ha’at mak iha Area Audian Postu Nain Feto nian no ida iha Dom Aleixu.

Atividade promosaun seluk mak promosaun ba folin tabaku nian. Tuir observasaun loja Rua no kioske Lima, mak eziste promosaun ba folin produtu sigaru nian, ne’e hatudu husi lista presu iha point of sell, ne’ebé mensiona ka promove ho meius folin tabaku menus ona husi presu dahuluk iha merkadu.

Durante observasaun no dadalia informal, ANCT la deskobre atividade patrosinu direita ba eventu ka ba programa ruma, ne’e hatudu sinal di’ak, maibé iha sorin seluk ami deskobre iha vendedores tabaku Ha’at husi amostra 150, ne’ebé simu bonus box fatin transparante fa’an tabaku nian, oferese husi distributor ka parte ne’ebé fa’an tabaku ho gratuitu ba vendedores sira. Ami nota ne’e nu’udar meius hodi promove promosaun iha points of sell ba produtu tabaku

3.2 Sigaru Illisitu

Husi Sample 150, vendedores 60 mak fa’an sigaru illisitu la ho aviza sanitaria (Pictorial Health Warning), maioria Sigaru ho tipu Surya Gudang Garam. Vendedores balun mak fa’an ho slop ba vendedores ki’ik sira. Sigaru marka seluk mak ho tipu Sampoerna ho Marlboro. Iha prosesu survey ANCT mós rekolla sigaru illisitu kulit mamuk ne’ebé fumantes sira soe iha fatin sira, ne’e ho objetivu atu hatene rasio husi sigaru illisitu ne’ebé ema konsumu area refere. Vendedores 30 mak fa’an Tabaku joker ho Tipu Matahari. Tabaku tipu ne’e kuaze fa’an iha vendedores ki’ik sira. Tuir ANCT nia survey ba daruak iha 2020 Produtu Tabaku Tipu Matahari, la komersializa iha Timor-Leste. Surya Gudang Garan iha maibé uitoan liu, kompara ho tempu estadu emergensia ni’an. Ne’e klaru hatudu katak, transaksaun ba sigaru illisitu sa’e durante Estadu Emergensia. No Entidade komersiantes sira hare Estadu Emergensia nu’udar oportunidade hodi halo fraku pulítika/lei kontrolu tabaku no espansa sira nia produtu.

4. Konkluzaun

Resultadu survey klaru demosntra, katak atividade komersializasaun tabaku illistitu sa’e a’as iha tenpu estadu emergensia nian, durante entidades inspesaun sira la-hala’o kontrolu regular hanesan tempu bain-bain. Komersilizasaun sigaru illisitu mak sai nu’udar atividade maioria ne’ebé vendedores sira komete. Tuir mak promosaun brand ba produtu tabaku nian ne’ebé tuir dekretu lei nú 14/2016- proibuidu ba entidades komersiates sira atu komete. Artigu 12-rotulazen no etiquetazen produtu tabaku, artigu 19, 20, 21-probuidu promosaun, publisidade no patrosinu ba kualker atividade husi entidades komersiates sira.  Ne’e mós hatudu katak, entidade komersiante sira hare Estadu Emergensia nu’udar oportunidade halo fraku tiha pulítika kontrolu tabaku nasaun nian no ekspansa sira nia produtu. Iha ne’ebé sei fó impaktu negativu ba reforsa pulítika kontrolu tabaku. Dezafiu ne’e bolu atensaun ba Guvernu atu labele abandona servisu kontrolu tabaku durante estadu emergensia. Importanti mós Guvernu tenke halo inspesaun immediata no regular durante Estadu Emergensia hodi prevene atividade promosaun, publisidade no transaksaun illisitu ba produtu tabaku.

5. Rekomendasaun

Bazeia ba resultadu survey iha leten, ANCT rekomenda aksaun imediata hirak hanesan tuir mai;

  1. Hasa’e servisu inspesaun no reforsa pulítika/lei tabaku hodi prevene transaksaun illisitu ka illegal
  2. Implementa koimas ba entidades komersiates sira ne’ebé kontra lei kontrolu tabaku
  3. Dezenvolve no oferese edukasaun ba vendedores sira kona-ba lei tabaku nian no sira nia papel.

“Dokumentu ne’e produs ho apoiu fundu husi The Union’ Kontiudu husi dokumentu ne’e responsabilidade husi autor no bele husi sirkuntasia refleta pozisaun The Union no Doadores nian”.

Print Friendly, PDF & Email

LEAVE A REPLY

Please enter your comment!
Please enter your name here