Home Notisia Ekipa Medikus Halo Ona Contact Tracing Ba Ema Ne’ebe Halo Kontaktu Besik...

Ekipa Medikus Halo Ona Contact Tracing Ba Ema Ne’ebe Halo Kontaktu Besik Ho Ema Positviu Covid-19

355
0
Portavoz CIJK, Dr. Rui Araujo. [Foto: Francisco JDA | 11.04.2020]

Reportazen Zevonia Vieira

Kazu positivu virus Corona foun ida ne’ebe afeta ba timoroan nudar kazu importadu, tanba nia halo viazen hosi nasaun afetada. Ba situasuan refere Neon Metin halo konfirmasaun oinsa ho kapasidade  ekipa hosi mediku sira ne’ebe halo Contact Tracing [buka tuir ema ne’ebe halo kontaktu ho ema positivu].

Ba Neon Metin Portavoz Centru Integradu Jestaun Krize [CIJK], Dr. Rui Araujo esplika katak Contact Tracing laos halo hosi ekipa Laboratoriu, maibe ekipa vizilansia epidemialojika. Iha ekipa ne’e medikus no infermeirus, sira mak akompanha kazu sira ne’ebe mak mosu, depois sira halo Contact Tracing [buka tuir ema ne’ebe halo kontaktu ho ema positivu] no kapasidade halo Contact Tracing laiha problemas.

Neon Metin mos halo konfirmasaun karik hosi rezultadu positvu ne’ebe afeta ba timoroan hela iha kuarentena, presiza halo Swab Test ba sira seluk iha Kuarentena?

Ba Neon Metin Dr. Rui hatan katak kriteriu ne’ebe mak uza ho baze sientifika ne’ebe mai hosi Organizasaun Mundial de Saude [OMS]  bele halo teste ba sira ne’ebe iha kontaktu besik teb-tebes ho ema ida ne’ebe positivu, katak nia koalia menus hosi 1 metru, liu minute 15.

Dr. Rui hatutan maibe mos rekomendasaun hosi OMS nian hateten katak la presiza halo teste ba ema hotu, liu-liu Timor sedauk iha kapasidade ida ne’e.

“Situasaun iha Timor nian agora ita iha rezientes ne’ebe limitadu, ita tenke rezerva para tarjetu ba ema sira ne’ebe hatudu sintomas no presiza duni halo analize. Saida mak ita halo oras ne’e,  sira ne’ebe kontaktu besik liu ne’e, ita observa intensivamente to’o agora, pelumenus sira ne’ebe kontaktu besik ne’e sedauk hatudu sintomas, maibe Ministeriu Saude mos estuda hela posibilidade loron hira tan se sira la hatudu sintomas, molok sira atu sai hosi kuarentena, karik presiza halo analiza ba sira, maibe tenke foti desizaun ida ne’e baze ba ita nia kapasidade stock rezientes ne’ebe iha”, esplika Dr. Rui ba Neon Metin, iha CCD 11/04.

Dr. Rui mos informa katak ba kuarentena ne’ebe foin dadauk hetan kazu positivu, Ministeru Saude ho nia ekipa vizilansia halo ona contact tracing ka buka ema hotu-hotu ne’ebe iha kontaktu besik tebes ho kazu positivu ne’e, hodi nune bele observa diak liutan. Sira ne’ebe iha kontaktu besik, Ministeriu Saude iha hotu ona dadus no loron hirak ne’e sei halo ezame ba sira.

Dr. Rui hateten Contact Tracing ka buka tuir ema neebe kontaktu besik liu ho kazu ida positivu ne’e, laos halo deit iha Timor, maibe halo mos iha pais ne’ebe ita nia maluk ne’e mai. Informasaun hotu ne’ebe mak ita nia maluk ne’e halo, ita hatoo ona liu hosi via diplomatika tanba ida ne’e responsabilidade ida mos.

LEAVE A REPLY

Please enter your comment!
Please enter your name here