Home Meio Ambiente Komunidade Aldeia Fatuk Francisco Kada Tinan Sofre Ba Inundasaun

Komunidade Aldeia Fatuk Francisco Kada Tinan Sofre Ba Inundasaun

552
0
valeta aat. [Foto: Umbelina | 05.10.2021]

Reportajen Umbelina dos Reis

Iha tempu udan, komunidade sira ne’ebe hela fatin risku la hakmatek, tanba iha situasaun tauk karik akontese inundasaun, sei hasoru risku boot ba sira nia moris, liu-liu ba ema vulneravel sira.

Família Barak iha Aldeia Fatuk Francisco, Suku Camea, Posto Administrativo Kristo Rei, kada tinan sofre inundasaun tanba la iha valeta, hodi kanaliza bee ne’ebé mai husi kadalak husi foho lolon.

Neon Metin dadalia komunidade sira ne’ebe hela iha aldeia Fatuk Francisco, ba preokupasaun ne’ebe sira iha bainhira udan boot mai. Ba Neon Metin komunidade sira hatoo hanoin katak tuir loloos konstrusaun valeta iha àrea ne’e tenke sai prioridade ba Programa Nasional Dezenvolvimentu Suku-PNDS, hodi evita inundasaun ne’ebé kada tinan afeta ba família barak iha Aldeia Fatuk Francisco.

Maria Elisa hela iha Aldeia Fatuk Francisco iha esperiénsia aat bainhira udan boot mai, hamosu inundasaun nune’e nia hela fatin bee sae kuaze metru ida, ninia familia sente ataparalla bainhira udan hetook aumenta liután.

“Kuandu tempu udan hau nia uma no viziñu sira, nian barak mak hetan estragus, inklui sasan, tamba bee husi kadalak sira iha foho maka’as no tama hotu ami nia uma no situasaun ne’e halo ami trauma no balun moras tamba problema ne’ebé mak ami hasoru”, haktuir Maria Elisa ho laran triste, hodi hanoin hikas, akontesimentu iha loron 4 Abril.

Problema ne’ebé mak komunidade hasoru, fanu mos entidade balun ninia laran luak, hodi tulun vítima husi dezastre naturais ne’ebé lakon esperansa tanba ne’e fenómenu ne’ebé serbisu Meteorolojia no Jeofízika hanaran Siklone Seroja

“Dezastre ne’e halo ami tenke lakon buat barak, tanba bee ne’ebé mai husi laletek sira iha foho hoban” tenik Maria, ne’ebé hanesan mos estudante Siénsia Saúde, Universidade Oriental Timor-Lorosa’e – UNITAL. 

Dadaun ne’e, iha époka bai-loron, maibé udan komesa tun ona no komunidade iha Aldeia Fatuk Franscisco sente katak konstrusaun valeta iha Aldeia ne’e urjente duni hodi hadia

“Konstrusaun valeta ne’e urjente duni, maske foin lalais ne’e, Programa Nasoes Unidas ba Apoiu Dezenvolvimemtentu (UNDP), mak finansia hodi hamoos, ke’e  no halo’os kanaliza bee husi kadalak sira husi foho, maibé ida ne’e la garante, wainhira udan bo’ot”, deklara Maria Elisa ba Neon Metin, iha Sesta-feira (01/10) iha nia rezidénsia iha Aldeia Fatuk Francisco. 

Inundasaun iha Aldeia Fatuk Francisco, la’os foin mak akontese, maibé dezde tinan 2015 no komunidade husu governu atu konstrui lalais.

“Komesa tinan 2015, bé tama hela de’it ami nia uma, durante tempu udan, governu presija tau atensaun ba problema ne’e no dadaun ne’e ami iha risku nia laran, tamba la iha valeta hodi satan netik ami husi perigu inundasaun” dehan Maria Elisa.

Nia mos relata katak problema seluk mak, moru protesaun husi mota Camea, ne’ebé foin hetan estragus durante dezastre naturais iha Fulan Abril foin lalais ne’e, seidauk hetan reabilitasaun no sei hasusar komunidade iha àrea Fatuk Francisco, wainhira governu la halo rekonstrusaun lalais.

Relasiona ho ezijénsia ne’e Xefe Aldeia Fatuk Francisco, Judit de Jesus da Silva rekoñese katak, àrea ne’e seidauk simu Programa Nasional Dezenvolvimentu Suku – PNDS no karik tama mak konstrusaun valeta sai prioridade, hodi proteje sidadaun husi dezastre naturais.

“PNDS to’o agora seidauk tama iha Aldeia Fatuk Francisco no iha espera katak, tinan oin bele tama ona no se karik mai mak ita sei tau prioridade ba konstrusaun valeta no kona ba problema ne’e mos autoridade lokal, hato’o ona proposta ba ministériu relevante”, dehan autoridade lokál ne’e.

Kona ba moru protesaun ne’ebé mak hetan estragus, hanesan projetu ho dimensaun bo’ot ne’e kompeténsia husi Ministériu Obras Públika hodi resolve.

Tuir dadus husi Membru Konsellu Suku Camea, Posto Administrativu Kristo Rei, Munisípiu Díli, projetu Programa Nasional Dezenvolvimentu Suku – PNDS 4 mak implementa iha suku ne’e.

Autoridade Lokal suku Camea, António Afanito Vieira Costa hateten dezde tinan 2017, projetu PNDS hamutuk haat mak implementa hela iha suku ne’e, ida mak reavitalizasaun ba sede suku, seluk seluk mak konstrusaun tanke konservatóriu ho dimensaun ki’ik iha aldeia Kaisabe, maib’e ida ne’e de’it mos la garante fornesiemtu bé mos ba komunidade hotu.

Kona ba Uma ba Kbi’it Laek (UKL), Suku Camea seidauk simu programa ne’e hodi tulun komunidade ne’ebé la iha kbi’it, atu hadi’a sira nia rezidénsia.

Problema seluk ne’ebe komunidade hela iha area refere observa mos tanba komunidade balun harii uma iha valeta leten no balun haklo’ot bee dalan, hodi prejudika kanal bee husi foho lolon to’o iha mota Camea besik terminal Becora.

Print Friendly, PDF & Email

LEAVE A REPLY

Please enter your comment!
Please enter your name here