Home Saude Fatin Kuarentena Laos Fatin Festa no Pasa Ferias, Dr. Rui: Presiza Disiplina

Fatin Kuarentena Laos Fatin Festa no Pasa Ferias, Dr. Rui: Presiza Disiplina

1152
0
Portavoz CIJK, Dr. Rui Araujo. [Foto: Francisco JDA | 11.04.2020]

Reportazen Zevonia Vieira

Centru Integradu Jestaun Krize [CIJK], kontinua publika informasaun relasiona ho kazu Covid-19 ne’ebe mak sai preokupasaun ba komunidade.

Relasiona ho kazu positivu foun ne’ebe iha loron 10/04 detekta iha kuarentena ho total 1, Portavoz CIJK, Dr. Rui Araujo informa ba publiku katak kazu positivu ne’e kazu importadu, sedauk iha transmisaun local hosi moras Corona ne’e iha Timor-Leste nia laran.

Ho situasuan iha kuarentena ne’ebe maluk sira la kumpri regras hosi Ministeriu Saude hatoo, liu hosi konferensia imprensa, Portavoz Dr. Rui apela  ba maluk timoroan sira neebe hela iha kuarentena nia laran, katak kuarentena ne’e fatin atu izola an, hodi nune’e sekarik ita lori virus ne’e, ita labele daet ba ema seluk.

“Fatin Kuarentena laos fatin ita atu halo festa, laos fatin ita atu dere viola hamutuk, kanta hamutuk no laos fatin atu joga karta hamutuk no laos fatin atu pasa ferias. Estadu hola medida ida ne’e tanba risku ne’ebe boot tebes hosi maluk timoroan sira ne’ebe mak halo viazen mai hosi zona afetada no durante viazen ne’e iha risku boot, atu hetan kontaziu, tanba ne’e mak presiza ita boot sira hela ketak durante loron 14. Wainhira durante loron 14 la hatudu sintomas, ita boot sira bele fila ba familia. Ida ne’e importante tanba ita hotu hatene katak familia timoroan sira iha ferik no katuas ne’ebe barak, ita mos hatene katak moras Covid-19 ne’e afeta ho nia gravidade ne’ebe boot liu ba ema idade 60 ba leten no mos ba ema ne’ebe iha moras seluk tan”, esplika Dr. Rui Araujo, iha CCD 11/04.

Dr. Rui hatutan katak ba maluk sira iha kuarentena, liu-liu iha fatin ne’ebe loron hirak liuba detekta kazu positivu, halo favor tuur hakmatek.  Husik estadu halo nia serbisu,  la presiza haruk mesajen ba liur hatete buat oin-oin. Ministeriu de Saude ho nia ekipa de vizilansia epidimialojika serbisu ho atensaun boot tebes ho baze protokulu ne’ebe iha, atu bele garante katak ita boot sira hetan izolamentu ne’ebe diak.

“Sekarik komesa hamosu sintomas, ita boot sira mos sei tuir ezame hosi laboratorial, enkuantu sedauk mosu sintomas halo favor tur nonok iha kuartu, lalika sai halibur malu iha lobby hotel nian ka ba vizita kolega sira iha kuartu seluk, presiza disiplina. Tanba nasaun barak sira la disiplina depois lori susar ba sira nia komunidade. Se mak hetan susar liu mak ita nia katuas no ferik sira. Iha pais barak mortalidade makaas liu ne’ebe ema ne’ebe idade 60 ba leten”. Hateten Dr. Rui

LEAVE A REPLY

Please enter your comment!
Please enter your name here