Reportazen Francisco JDA
Consello Combatente Libertasaun Nasionál (CCLN) liu hosi konferensia imrensa hateten situasaun moras surtu Covid-19 nudar inimigu komun ida ne’ebe hatodan liutan situasaun politika iha Timor-Leste.
Ho situasaun ne’e CCLN hare hosi referensia ba krize 2006-2007 mosu tanba laiha komunikasaun politika atu resolve problema sira molok sai boot.
Tuir Presidente Admistrasaun CCLN, Vidal de Jesus “Riak Leman” ba jornalista sira hateten Consello Combatente iha ona hanoin no planu atu halo aprosimasaun ba maun boot Xanana Gusmao, Ramos Horta, Lu-Olo, Lere, Taur Matan Ruak, sei hasoru malu iha loron ida maibe atu hasoru no malu rona malu ne’e kleur tiha ona, iha kedas VII Governu mai too ohin loron.
“Nudar Conselho la iha komprimisiu ida dehan katak aban ami atu lori sira ba tur hamutuk ou bainrua, maibé sei lori tempu. Iha tempu liu ba Negosiante sira hanesan faan modo no ai-leba oan sira, ita hare ohin loron sira infrenta ekonomia ne’e mukit tebes, Conselho rekomenda ba maun boot sira no líder sira katak, dulas volante ne’e tenke dulas tuir Konstituisaun nia hakarak, dulas tuir Lei nia hakarak, se dulas la dun di’ak hanesan presente ida ita rai hela ba ita nia oan no jerasaun sira ne’ebé mai”, hateten Presidente CCLN, Ruak Leman iha Kaikoli, 13/05
Iha fatin hanesan Porta Voz CCLN, Marito Reis hateten CCLN apela ba eis titular no orgaun soberanu sira atu kaer metin Konstituisaun, hodi hala’o sira nia knaar, atu harii no hametin estadu direitu demokratiku.
Husu mós líder polítiku sira lori Konstituisaun no Lei nudar matadalan respeitu prinsipiu demokratiku no estadu direitu iha asaun polítika, nafatin enkoraza polítiku sira atu promove dialogu hodi hamutuk buka sosluasaun ba problema nasaun nian tuir dalan legal no Konstituisaun ne’ebé vigora iha Timor Leste.
