Reportajen Adroaldo, Calisto Oqui
Kandidatu Prezidente Repúblika, Virgílio da Silva Guterres “Lamukan” ho númeru sorteiu 12, iha nia kampaña politik ne’ebe monu iha loron 8 Marsu, nu’udar loron mundiál feto, hato’o nia reflesaun. Loron atu hanoin feto sira nia luta naruk liuhosi movimentu feminista oioin, hodi hetan igualdade, igualdade de oportunidade, igualdade asesu ba servisu, igualdade ba pagamentu no Igualdade tratamentu
Lamukan deklara katak ba kazu violasaun hasoru feto, sekarik nia sai Prezidente Republika sei la fo indultu ba pedófilu ka pemerkosa, tanba kazu ne’ebe la eduka no laiha moral
“Ha’u lae, nia pedófilu, halo abuzu, ne’ebé se ha’u sai Prezidente ha’u sei la fo indultu ba pemerkosa, estrupador ka pedófilu sira, ha’u sei la fo indultu, ne’e ha’u komprimísiu ba feto sira sira, ba feto sira ne’ebé ke sakrifika sira nia aan ona, feto sira ne’ebé ke terus tanba sira nia la’en, sira nia oan mane mate, lakon buka rate la iha, ida ne’e mak ha’u nia kompromisu,” hatete Virgílio iha nia kampaña eleitoral ne’ebé hala’o iha Díli, Tersa-Feira, 08/03.
Lamukan dehan iha loron 8 Marsu loron atu fo apoiu ba sira nia luta naruk. Loron atu hamriik hamutuk ho sira hodi hakilar a luta kontinua. Loron 8 Marsu laos loron atu aifunan bukek furak ba feto sira, maibe loron atu alinha-an ho sira iha sira nia marxa naruk hodi harahun dominasaun maskulinista, kultura patriarkal, kultura maxista iha ita nia sosiedade.
Nia mos hato’o katak iha loron 8 Marsu, loron atu hanoin hikas asswa’in feto Rosa Muky Bonaparte, Maria Gorreti, Wewe, Bilear, Bidolimau, Bimali, Soimali, Maria Tapo, Alexandrina Guterres, Bisoi, Bimesak, Kasian, feto faluk sira iha Krarás no feto seluk tan nia luta.
“Loron 8 Marsu la’os loron atu halo festa, maibe atu luta, luta kontra dezigualdade sosiál ne’ebe halo feto sira sai atan ba kultura machista. Luta kontra injustisa sosial nebe tau feto hanesan sidadaun segunda klasse. Luta kontra poligamia no luta kontra pedofilia”, dehan Lamukan
Lamukan mos deklara katak nia ideolojia nu’udar feminista, bainhira hamutuk nia maluk mane lubuk harii Asosiasaun Mane Kontra Violensia (AMKV), iha inisiu 2022, nia involve ona iha kampaña igualdade feto iha rejiaun ASEAN, liuhosi intervensaun iha seminariu no kolókiu internasional nebe ko’alia konaba asuntu luta feto nian.
Lamukan mos hato’o nia parabéns ba FOKUPERS, tanba nu’udar organizasaun feto ne’ebe moris kedas iha períodu integrasaun, hodi halo advokasia ba feto sira nebe sai vítima ba violensia seksual militar indonesia, mane timor sira nebe iha poder, inklui padre sira balun.
Ba JU,S tanba ho aten-barani tebes halo advokasia ba alin-feto sira nebe sai vítima ba abuzu seksual, pedofilia no pornografia infantil, eis-padre Richard Daschbach iha Topu-Honis, Kutete, Oe-cussi.
Ba Rede-Feto, Klibur Movimentu Feto Foinsae tan kontinua luta ba igualdade feto nian.
Tenki hakilar maka’as liu tan! Tenki halo luta feto nian sai luta politika-ideolojika, la’os luta sosial ka aktu karidade. Ba maluk feto sira, hosi Fronteira to’o Lautém, hosi Oekussi to’o Jaco liu Atauro, sura ho ha’u iha imi nia luta. “Imi nia luta, ha’u nia luta! Imi nia luta, Timor-Leste nia Luta!
