Reportajen Adroaldo, Calisto Oqui
Kampaña ba loron da hitu, kandidatu Prezidente Republika, Virgílio da Silva Guterres “Lamukan” ko’alia ho nia eleitoradu sira iha Díli, Ai-tarak Laran. Iha diálogu ne’e Virgilio ho nia kumprimisu polítika katak, wainhira eleitu nu’udar Prezidente, sei harii abitasaun ka zona rezidensiál ba estudante universitáriu sira, hodi fasilita sira nia estudu no moris iha kapitál, nune’e mos ba sidadaun sira iha Díli, tanba nia haree sidadaun barak mak seidauk hela iha fatin ne’ebé dignu.
Iha diálogu ho komunidade sira iha Ai-tarak-Díli, Lamukan hatete atu garante moris di’ak, Prezidente tenke komunika ho governu hodi harii abitasaun ba povu atu moris dignu, hodi fasilita sira nia atividade iha kapital.
“Halo perumahan iha Díli ba estudante sira, ita iha Díli universidade barak maibé la iha asrama mahasiswa, la iha kazerna ba estudante sira. Povu ne’ebé moris iha sidade kapital, iha dignidade atu moris hanesan sidadaun ne’ebé dignu iha kapital ida ne’e. Labele membru governu moris iha uma di’ak, sa’e karreta ba mai, povu moris kiak hela iha estrada ibun,” lamenta Virgílio.
Nia hatete númeru sorteiu 12, ne’e nu’udar númeru joven nian 12 Novembru, tanba ne’e mak juventude 12 Novembru mak fo duni númeru sorteiu ida ne’e, atu asume responsabilidade hodi haree ba situasaun moris ohin loron ne’ebé la dignu.
